Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 95 Hüküm no: 53 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Mustafa’nın zahire bedelinden Hasan b. Abdullah’da olan alacağının ödenmesi Mahmiye-i İstanbul’da Debbâğ Yunus mahâllesinde sâkin Bakkāl tâifesinden işbu bâ‘isü’l-vesîka el-Hâc Mustafa b. Mehmed nâm kimesne mahmiye-i mezbûrede meclis-i şer‘-i hatîrde sâbıkā sipâhîler ağası olan Mehmed Ağa’nın hazînedârı el-Hâc Hasan b. Abdullah nâm kimesne mahzarında üzerine da‘vâ ve takrîr-i kelâm edip merkūm el-Hâc Hasan bundan akdem bakkāl metâ‘ından yedinden on bir ayda pirinç ve yağ ve bal ve nohud ve nişasta ve soğan ve şem‘-i revgan ve şem‘-i asel ve sâir metâ‘ iştirâ edip her birinin bahasını ba‘de’l-kat‘ işbu yedimde olan mümzâ ve mahtûm deyn temessükü hâmişinde tahrîr ve hesâb olunduğu üzere on bir ayda iştirâ eylediği emti‘â-i mezbûre bahasından [12b] cem‘an yüz yirmi altı bin yedi yüz dokuz sağ akçe ve hesâb-ı atikden dahi yedi bin sağ akçe ki min-haysü’l-mecmû‘ mezbûr el-Hâc Hasan zimmetinde yüz otuz üç bin yedi yüz dokuz sağ akçe hakkım olmağla meblağ-ı mezbûrun elli altı bin dokuz yüz yirmi akçesini mezbûr el-Hâc Hasan bana edâ ve teslîm, ben dahi yedinden ahz u kabz edip medfû‘undan bâkī yetmiş altı bin yedi yüzdokuz sağ akçe olmak üzere altı yüz otuz dokuz guruş ve otuz altı para mezbûr el-Hâc Hasan’ın zimmetinde kalmışdır, hâlâ suâl olunup alıverilmesi matlûbumdur dedikde, gıbbe’s-suâl mezbûr el-Hâc Hasan cevâbında müdde‘î-i mezbûrun bâlâda iddi‘â etdiği vech üzere bakkāl metâ‘ından hesâb-ı atikden yedi bin akçe ile on bir ayda dahi müdde‘î-i mezbûrdan pirinç ve yağ ve bal ve nohud ve nişasta ve soğan ve şem‘-i revgan ve şem‘-i asel ve sâir metâ‘ iştirâ eylediğini ikrâr, lâkin akd-i bey‘ kendü ile olduğunu inkâr edicek müdde‘î-i mezbûrdan ber-vech-i muharrer müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Unkapanı dâhilinde Haraççı Hamza mahâllesinde sâkin es-Seyyid İbrahim b. es-Seyyid Mehmed ve Hoca Hamza mahâllesinde sâkin Hüseyin Çelebi b. Hüseyin nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka işbu mezbûr el-Hâc Hasan müdde‘î-i mezbûr yedine verdiği deyn temessükü bâlâsında tahrîr ve hesâbı vech üzere akd-i mezbûru bizim huzûrumuzda kendi edip kendinin hesâb etdiği vech üzere <> hesâb-ı atikden bâkī yedi bin sağ akçe ile on bir ayda iştirâ eylediği bakkāl metâ‘ından olan eşyâ-yı mezbûre bahasından dahi yüz yirmi altı bin yedi yüz dokuz sağ akçe ki min-haysü’l-mecmû‘ yüz otuz üç bin yedi yüz dokuz sağ akçe zuhûr edip ber-vech-i muharrer temessük-i mezbûru imzâ ve mühürleyip müdde‘î-i mezbûr yedine vermiş idi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûrun meblağ-ı mezbûrdan kabzını i‘tirâf eylediği elli altı bin dokuz yüz sağ akçe olmak üzere altı yüz otuz dokuz guruş ile otuz altı parayı müdde‘î-i mezbûra edâ ve teslîme mezbûr el-Hâc Hasan’a tenbîh birle mâ-vaka‘a bi’t-taleb ketb olundu. Fi’l-yevmi’l-hâdi ve’l-ışrîn min-Muharremü’l-haram li-sene sitte aşere ve mi’e ve elf. Şuhûdü’l-hâl: el-Hâc Mehmed Efendi el-kādı, Ömer Efendi el-kâtib, Emin Mehmed Efendi el-kâtib, İsmail Efendi, el-Hâc Yusuf.