Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 96 Hüküm no: 54 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi Vakfı mütevellisi Ayşe bt. Mehmed’in, Halil b. İbrahim aleyhindeki oda davasının reddedilmesi Mahmiye-i İstanbul’da vâki‘ merhûm Mehmed Efendi nâm sâhibü’l-hayrın vakfına evlâdiyet ve meşrûtiyet üzere mütevellîye olan Âişe bt. Mehmed nâm hatun mahmiye-i mezbûrede meclis-i şer‘-i hatîrde zikri âtî vakıf odaya vâzı‘ü’l-yed olan işbu bâ‘isü’l-kitâb el-Hâc Halil b. İbrahim nâm kimesne mahzarında bi’t-tevliye üzerine da‘vâ ve takrîr-i kelâm edip vakf-ı mezbûrdan olup mahmiye-i mezbûrede Debbâğ Yunus mahâllesinde vâki‘ müteehhilîn odalarının birinde icâreteyn-i ma‘lûmeteyn ile sâkine ve mutasarrıfe iken vefât eden Âişe bt. Ali b. Murad nâm hatun hayâtında mutasarrıfe olduğu odasını benim iznim ve ma‘rifetimle bedel-i ma‘lûm mukābelesinde mezbûr el-Hâc Halil’e ferâğ ve tefvîz, ol dahi tefevvüz ve kabûl edip tevliyetim hasebiyle tasarrufuna izin ve temessükün tahrîr edip mühürlemiş idim. Lâkin müteveffât-ı mezbûre Âişe Hatun hîn-i ferâğında hasta ve sâhib-i firâşe olup ol hastalıkda iken fevt olmağla ferâğ-ı mezbûr bu vech üzere maraz-ı mevtde olup mu‘teber olmamağla mezbûre Âişe Hatun bilâ-veled fevt olup oda-i mezbûre cânib-i vakfa intikāl etmekle mezbûr el-Hâc Halil’e suâl olunup şer‘îsi icrâ olunmak matlûbumdur dedikde, gıbbe’s-suâl mezbûr el-Hâc Halil cevâbında müteveffâ-yı mezbûre Âişe Hatun tarafında olan oda-yı mezbûreyi hayâtında ve kemâl-i akl ü sıhhatinde cemî‘ tasarrufât-ı şer‘iyyesi câize ve teberru‘ât-ı mer‘iyesi nâfize olduğu hâlde huzûr-ı Müslimînde bana bedel-i ma‘lûm ve makbûz mukābelesinde ferâğ ve tefvîz, ben dahi tefevvüz ve kabûl edip mütevellîye-i mezbûre tasarrufuma izin vermişdi deyü def‘le mukābele edicek, gıbbe’l-istintâk ve’l-inkâr mezbûr el-Hâc Halil’den def‘-i mezkûruna beyyine taleb olundukda udûl-i Müslimînden olup Sultân Câmi‘-i şerîfi’nde imam vekîli olan Hasan Efendi b. Mustafa ve Türbedâr Hüseyin Halîfe b. Mustafa nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka müteveffât-ı mezbûre Âişe Hatun bt. Ali b. Murad hayâtında ve kemâl-i akl ü sıhhatinde cemî‘ tasarrufât-ı şer‘iyyesi câize ve teberru‘ât-ı mer‘iyesi [13a] nâfize olduğu hâlde bizim huzûrumuzda tasarrufunda olan oda-i mezbûreyi bedel-i ma‘lûm ve makbûzu mukābelesinde mezbûr el-Hâc Halil’e ferâğ ve tefvîz ol dahi tefevvüz ve kabûl edip mütevellîye-i mezbûre dahi tasarrufuna izin vermiş idi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mütevellîye-i mezbûre bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâdi ve’l-ışrîn min-Muharremü’l-haram li-sene 1116. Şuhûdü’l-hâl: el-Hâc Mehmed Efendi el-kâtib, İsmail Efendi el-kâtib, Veliyüddin Efendi el-kâtib, Ömer Efendi el-kâtib, Mustafa Efendi el-kâtib, Mehmed Efendi el-kâtib.