Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 97 Hüküm no: 55 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Mehmed’in varislerinin kendilerine intikal eden bağ ve tarlaları Hüseyin b. Bekir’e satmaları Mahmiye-i İstanbul’da Âşıkpaşa mahâllesi sâkinlerinden iken bundan akdem vefât eden İbrahim b. Mehmed nâm kimesne verâseti sagīr oğulları Süleyman ve Mehmed ile kebîre kızları Âişe ve Fâtıma’ya münhasıra olduğu müte‘ayyin oldukdan sonra sagīrân-ı mezbûrânın tesviye-i emrlerine kıbel-i şer‘den mansûb vasîleri olan Osman b. Süleyman nâm kimesne mezbûretân Âişe ve Fâtıma taraflarından vekâleten ve sagīrân-ı mezbûrân taraflarından vesâyeten mahmiye-i mezbûrede meclis-i şer‘de bâ‘isü’l-vesîka Hüseyin b. Mehmed nâm kimesne mahzarında bi’l-vekâle ve bi’l-vesâye ikrâr-ı tam ve takrîr-i kelâm edip mezbûretân Âişe ve Fâtıma ile sagīrân-ı mezbûrânın babalarından müntakil Kastamonu sancağında Bakır Küresi’ne tâbi‘ Felhan nâm karyede vâki‘ ma‘lûmü’l-hudûd eşcâr-ı müsmireyi hâvî bir mikdâr bahçe ile çiftlik ta‘bîr olunur bir bâb oda harâb olup hâsılı harcına vefâ etmediğinden mâ‘adâ nafakaya dahi eşedd-i ihtiyâçları olup bey‘ olunması evlâ ve ahrâ olmağla mezbûr Hasan’a on beş guruşa bey‘ ve temlîk ve yine çiftlik-i mezbûre teba‘iyet ile zirâ‘at ve hırâset olunur sekiz kıt‘a tarlalarını dahi ma‘rifet-i sâhib-i arz ile on guruş bedel mukābelesinde ferâğ ve tefvîz ol dahi vech-i muharrer üzere iştirâ ve temellük ve tefevvüz ve kabûl eyledikden sonra semen-i mezkûr ile bedel-i mezkûr ile bedel-i merkūm cem‘an yirmi beş guruşu merkūm Hüseyin bana def‘ ü teslîm, ben dahi vesâyeten ve vekâleten yedinden tamâmen alıp kabz edip mahâllerinde kabz [ve] zabt-ı tasarrufa mezbûru taslît eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Muharremü’l-haram sene 1116. Şuhûdü’l-hâl: Mahmud Beşe b. Veli, Abdullah Çelebi b. Ali, Osman Çelebi b. Abdullah, Süleyman b. Şaban, Hüseyin Beşe b. Şaban, Mehmed b. Ahmed, el-Hâc Yusuf b. Osman