Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 98 Hüküm no: 56 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vartarez bt. Misail’in ev eşyaları ile değirmen hissesini torunu Ermiya’ya hibe etmesi Mahrûse-i Galata muzâfâtından kasaba-i Kasımpaşa’da Kulaksız el-Hâc Ahmed mahâllesinde sâkine ve zâtı Misail v. Ananya ve Ohan v. Fahrat nâm Ermeniler ta‘rîfleriyle mu‘arrefe olan Vartarez bt. Misail nâm Nasrâniye mahmiye-i İstanbul’da meclis-i şer‘-i hatîrde takrîr-i kelâm ve ta‘bîr ani’l-merâm edip eşyâ-yı memlûkemden beş tencere ve on altı sahan ve bir sini ve bir güğüm ve dört yorgan ve iki kilim ve iki velence ve yedi yemenî yasdık ve bir kaliçe ve üç minder ve üç döşeğimi sadrî kebîr oğlum olup bundan akdem hâlik olan Kazer nâm Ermeni’nin sulbî sagīr oğlu ve vasîsi olduğum işbu Ermiya’ya hibe-i sahîha-i şer‘iyye ile hibe ve temlîk ve yine meclis-i hibede vesâyeten eşyâ-yı mezkûreyi sagīr-i mezbûr için ahz u kabz eylediğimden mâ‘adâ mahâlle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât Ekmekçi fırınında mevcûde olan âlâtın on iki sehmden bir sehim hissede ve sâkine olduğum menzil içinde mevcûde olan sâir eşyâda benim kat‘â alâka ve medhalim kalmayıp cümlesi sagīr-i mezbûr Ermiya’nın mülk-i mahz ve hakk-ı sırfı olmağla bu vech üzere üzerimde lâbise olduğum işbu köhne libâsımdan gayrı ismi mâl ıtlâk olunur bir nesnem yokdur, cümlesi sagīr-i mezbûrun mülküdür dedikde hıfzan li’l-makāl mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Muharremü’l-haram li-sene sitte aşere ve mi’e ve elf. Şuhûdü’l-hâl: Ahmed Beşe b. ( ), Memiş Beşe b. ( ), Berber Ali Çelebi b. ( ), Küçük Mehmed b. ( ), Bakkāl Mehmed Çelebi b. ( ), Sakā Mehmed Beşe b. Osman, el-Hâc Yusuf b. ( ), Begos v. Maskod, Mikal v. Mosis, Bedros v. ( ), Alekson Ekmekçi, Maverdi, Ekmekçi