Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 99 Hüküm no: 57 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Trabzonlu Tonos’un Mehmed b. Ali’de olan alacağını tahsil etmesi Vilâyet-i Anadolu’da Trabzon ahâlîsinden olup mahmiye-i İstanbul’da müsâfiren sâkin Tonos v. Lefter nâm zimmî mahmiye-i mezbûrede meclis-i şer‘de es-Seyyid Mehmed b. es-Seyyid Ali nâm kimesne mahzarında ikrâr ve takrîr-i kelâm edip bundan akdem mezbûr es-Seyyid Mehmed malımdan bi-gayrı hakkın beynimizde ma‘lûm bir husûs için elli guruşumu ahz u kabz etmekle ben dahi meblağ-ı mezbûru merkūm es-Seyyid Mehmed’den taleb ve da‘vâ eylediğimde ol dahi kırk iki guruşu ahz ve kabzını ikrâr, ziyâde sekiz guruşunu inkâr etmişidi. El-hâletü hâzihi merkūm es-Seyyid Mehmed kabzını i‘tirâf eylediği kırk iki guruşu bana def‘ ü teslîm ben dahi yedinden ba‘de’l-ahz ve’l-kabz bâkī müdde‘âm olan sekiz guruşa ve gayre [13b] müte‘allıka âmme-i da‘vâ ve mutâlebâtdan ben mezbûr es-Seyyid Mehmed’in zimmetini ibrâ ve iskāt edip ol dahi husûs-ı mezbûra ve gayra müte‘allıka âmme-i de‘âvî ve mutâlebâtdan benim zimmetimi ibrâ ve iskāt eyledi. Min-ba‘d husûs-ı mezbûra ve gayra müte‘allıka âmme-i da‘vâdan her birimiz âhar ile vechen mine’l-vücûh aslâ da‘vâ ve nizâ‘ımız kalmamışdır, tarafeynden ba‘de’l-yevm da‘vâ zuhûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Muharremü’l-haram li-sene 1116 Şuhûdü’l-hâl: Es-Seyyid Hüseyin Çavuş b. Hüdaverdi, el-Hâc Seyyid Halil Çavuş b. ( ), es-Seyyid Mehmed Çavuş ( ), Hüseyin Beşe b. Mehmed, Eyüb Beşe b. ( ), Ömer Efendi b. ( ), İsmail Efendi kâtib.