Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 99 Hüküm no: 58 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Hasan’ın, Kabakulak Hanı’ndaki hissesini Osman Ağa’ya kiraya vermesi Mahmiye-i İstanbul’da el-Hâc Evhad mahâllesi sâkinelerinden Ümmühani bt. Hasan nâm hatun tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iyye ile ârifân Mehmed Beşe b. Ali ve Mustafa b. Ali nâm kimesneler şehâdetleri ile şer‘an sâbit olan Halil b. Ali nâm kimesne mahmiye-i mezbûrede meclis-i şer‘-i hatîr-i lâzımü’t-tevkīrde işbu bâ‘isü’l-vesîka Osman Ağa b. İbrahim nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Ümmühani Hatun’un icâreteyn ile Ayasofya-i kebîr kurbünde Kabakulak Hanı demekle ma‘rûf handa olan sülüs hissesini bin yüz on altı Muharrem’i gurresinden bir sene tamâmına değin beher ay otuz beşer guruş vermek üzere dört yüzyirmi guruşa mezbûr Osman Ağa’ya icâr ve teslîm ol dahi ber-vech-i muharrer isticâr ve tesellüm ve kabûl eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Muharremü’l-haram li-sene sitte aşere ve mi’e ve elf Şuhûdü’l-hâl: Molla Zekeriya b. Ali, Gedik Çavuş, Musa b. Mehmed, Veli Bey b. Ali, Mehmed b. Receb Mustafa b. Mehmed.