Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 100 Hüküm no: 59 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedreddin Bey’in, Hazer v. Yani’ye borçlu olduğunun tescili Sâbıkā Diyarbekir eyâletinde Cizre Beyi olup mahmiye-i İstanbul’da müsâferet vechi üzere sâkin olan Bedreddin Bey b. Hatem nâm kimesne mahmiye-i mezbûrede Meclis-i şer‘-i hatîrde ekmekçi tâifesinden işbu bâ‘isü’s-sifr Hazer v. Yani nâm zimmî muvâcehesinde ikrâr ve takrîr-i kelâm edip mezbûr Hazer yedine verdiğim temessük nâtık olduğu üzere bundan akdem mezbûr Hazer’den beş yüz elli guruş iktirâz ve kabz ve masârıfıma sarfla istihlâk etmekle bu vecih üzere cihet-i karz-ı şer‘îden zimmetimde vâcibü’l-edâ ve lâzımü’l-kazâ merkūm Hazer’e hâlâ beş yüz elli guruş deynim vardır dedikde mezbûr Hazer dahi mukırr-ı mezbûru ikrâr-ı meşrûhunda vicâhen ve şifâhen tasdîk ve tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Muharremü’l-haram sene 1116 Şuhûdü’l-hâl: el-Hâc Mehmed b. Hüseyin, Seyyid Ahmed Çelebi b. Mehmed, Veli Çavuş mübâşir, Ahmed Çelebi b. Abdullah, el-Hâc Yusuf.