Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 101 Hüküm no: 62 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa ve kız kardeşi Rabia’nın, babalarından intikal eden alacaklarının kefil Ali Ağa’dan tahsili Bâ-imzâ-i hazret-i veliyyü’n-ni‘am efendi. Mahmiye-i İstanbul’da Horhor Çeşmesi kurbünde İsmail Ağa mahâllesinde sâkin iken bundan akdem fevt olan Mustafa Ağa b. Hasan nâm kimesnenin verâseti li-ebin er karındaşı es-Seyyid Mehmed Ağa ile li-ebin kız karındaşı Şerîfe Rabia’ya münhasıra olduğu lede’ş-şer‘ zâhir ve mütehakkık oldukdan sonra mezbûrân Seyyid Mehmed Ağa ve Şerîfe Rabia mahmiye-i mezbûrede meclis-i şer‘de Basra vâlisi oldukdan sonra fevt olan Osman Paşazâde merhûm Ahmed Paşa’nın hayâtında kethüdâsı olan Ali Ağa b. Süleyman mahzarında her biri üzerine da‘vâ ve takrîr-i kelâm edip işbu yedimizde olan deyn temessükü nâtık olduğu üzere mûrisimiz müteveffâ-yı mezbûr Ahmed Paşa zimmetinde cihet-i karz-ı şer‘îden yedi bin beş yüz guruş hakkı olup meblağ-ı mezbûra işbu mezbûr Ali Ağa gāibân ani’l-meclis Mütesellim Hasan Ağa ve Acem Ramazan Ağa ile ma‘an kefil oldukdan sonra meblağ-ı mezbûru kable’l-ahz ve’l-istiğfa mûrisimiz mezbûr Mustafa Ağa ile mezbûr Ahmed Paşa müte‘âkiben fevt olup meblağ-ı mezbûr ırsen bize intikāl etmekle hâlâ kefâletine binâen meblağ-ı mezbûrdan hissesine isâbet eden mikdârı mezbûr Ali Ağa’dan taleb eylediğimizde edâdan imtinâ‘ eder. Suâl olunup alıverilmek matlûbumdur dedikde gıbbe’s-suâl mezbûr Ali Ağa cevâbında fi’l-vâki‘ meblağ-ı mezbûr yedi bin beş yüz guruşa gāibân-ı mezbûrân Hasan Ağa ve Acem Ramazan Ağa ile ma‘an kefil olduğunu ikrâr u i‘tirâf etmeğin mûcebince meblağ-ı mezbûr yedi bin beş yüz guruşdan kefâletine binâen hissesine isâbet eden mikdârı müdde‘iyân-ı mezbûrâna edâ ve teslîme mezbûr Ali Ağa’ya tenbîh olunup mâ-vaka‘a bi’t-taleb ketb olundu. Fî 20 min-Muharremü’l-haram sene 1116 Şuhûdü’l-hâl: Fahrü’l-kuzât Ali Efendi b. Abdurrahman, Fahrü’l-müderrisîn Mustafa Efendi Luhumîzâde, Ali Efendi b. Ahmed Efendi, el-Hâc Mehmed Efendi b. Ahmed, Veli Efendi el-kādı.