Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 102 Hüküm no: 63 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Osman’ın eşi Ahmed’den muhalaa usulüyle boşanması Mahmiye-i İstanbul’da Topkapısı kurbünde Ereğli mahâllesi sâkinelerinden olup zâtı ta‘rîf-i şer‘î ile mu‘arrefe olan Safiye bt. Osman nâm hatun mahmiye-i mezbûrede meclis-i şer‘de işbu bâ‘isü’l-vesîka zevc-i muhâlı‘ı Ahmed b. Hüseyin nâm kimesne mahzarında ikrâr ve takrîr-i kelâm edip zevcim mezbûr Ahmed ile beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh olan bin beş yüz akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere mezbûr Ahmed ile muhâla‘a-i sahîha-i şer‘iyye ile muhâla‘a olup ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allıka âmme-i da‘vâ ve mutâlebâtdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fî 27 min-Muharremü’l-haram sene 1116. Şuhûdü’l-hâl: Hüseyin Efendi el-kâtib, İsmail Efendi el-kâtib, Mehmed Efendi el-kādı, Mustafa Efendi el-kādı, el-Hâc Mustafa el-mukayyid.