Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 102 Hüküm no: 64 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şaban Efendi’nin, Rukıye bt. Ali’den aldığı borç karşılığı evini istiğlal yoluyla satışı Mahmiye-i İstanbul’da Efdalzâde mahâllesi sâkinlerinden olup Rumeli kuzâtından Şaban Efendi b. Halil nâm kimesne mahmiye-i mezbûrede meclis-i şer‘de bâ‘isetü’l-vesîka bundan akdem fevt olan İsmail Efendi nâm kimesnenin evlâd-ı sıgārının vasîleri olan vâlideleri Rukıye bt. Ali nâm hatun muvâcehesinde ikrâr-ı tam ve takrîr-i kelâm edip yedimde mülküm olup mahâlle-i mezbûrede vâki‘ bir tarafdan Medîne-i münevvere Vakfı ve bir tarafdan Mustafa Efendi mülkü ve bir tarafdan ba‘zan Veli Ağa nâm kimesne veresesi menzili ve ba‘zan Hasan Efendi odaları ve taraf-ı râbii tarîk-i âm ile mahdûd menzilimi vasiyy-i mezbûr Rukıye’ye yüz elli guruşa bi-tarîkı’l-istiğlâl bey‘ ü teslîm ol dahi ber-vech-i muharrer mâl-ı sıgār-ı mezkûre ile iştirâ ve kabz ü tesellüm edip semeni olan meblağ-ı mezbûr yüz elli guruşu vasiyy-i mezbûre bana def‘ ü teslîm ben dahi yedinden ahz u kabz eylediğimden sonra ba‘de’t-tahliyeti ve’t-takābuz zikr olunan menzili târîh-i kitâbdan üç yüz altmış gün tamâmına değin mezbûre Rukıye bana yirmi iki buçuk guruşa icâr ben dahi isticâr ve kabûl eyledim dedikde, gıbbe’t-tasdîk mezbûr Şaban Efendi yine meclis-i şer‘de el-Hâc Ali b. Rasul mahzarında ikrâr ve takrîr-i kelâm edip mebî‘-i mezkûr hükmen rehin olmağla ecel-i mezkûr hulûlünde meblağ-ı mezbûru merkūme Rukıye’ye edâdan âciz olursam zikr olunan menzili âhara semen-i misline bey‘ ve semeninden meblağ-ı mezkûru merkūme Rukıye’ye edâ ve fazla kalırsa bana îsâle ve bunlar mütevakkıf olduğu umûrun küllîsine azil ve in‘izâlden masûne vekâlet-i devriye ile tarafımdan mezbûr el-Hâc Ali vekîl nasb u ta‘yîn eyledim dedikde, ol dahi vekâlet-i mezbûre’yi kabûl ve merâsimini edâya müte‘ahhid olmağın mâ-vaka‘a bi’t-taleb ketb olundu. Hurrire fi’s-sâbi‘ ve’l-ışrîn min-Muharremü’l-haram sene 1116. Şuhûdü’l-hâl: Veliyüddin Efendi el-kādı, Hasan Çelebi b. Ali, İbrahim Çelebi b. Mehmed, Mustafa Çelebi b. Veli, Musa Bey b. Receb, el-Hâc Mehmed b. Ali, Ali Çelebi b. Ahmed, el-Hâc Yusuf b. Osman.