Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 103 Hüküm no: 65 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Bey’in, Altıparmak Mustafa Beşe’de kalan alacağının kefillerinden tahsili Vilâyet-i Anadolu’da Eğin kazâsı ahâlîsinden olup mahmiye-i İstanbul’da müsâfiren sâkin işbu râfi‘ü’l-vesîka Hasan Bey b. Osman nâm kimesne mahmiye-i mezbûrede meclis-i şer‘de İsmail Beşe b. Ahmed ve Süleyman Beşe b. Ali ve Veli b. Ali nâm kimesneler mahzarlarında üzerlerine da‘vâ ve takrîr-i kelâm edip kazâ-i mezbûr ahâlîsinden iken bundan akdem fevt olan Altıparmak demekle ma‘rûf Mustafa Beşe b. Mehmed nâm kimesne zimmetinde cihet-i deyn-i şer‘îden beş yüz yirmi guruş hakkım olmağla meblağ-ı mezbûra mezbûrûn İsmail Beşe ve Süleyman Beşe ve Veli tarafından îcâb ve kabûlü hâvî kefâlet-i sahîha-i şer‘iyye ile kefil olduklarından sonra meblağ-ı mezbûru kable’l-edâ mezbûr Mustafa Beşe fevt olmağla meblağ-ı mezbûrun yüz altmış guruşunu müteveffâ-yı mezbûrun kıbel-i şer‘den mansûb vasîsi gāib ani’l-meclis Ali b. Veli nâm kimesneden tereke-i müteveffâ-yı mezbûreden ahz u istîfâ edip bâkī üç yüz altmış guruş hakkım kalmağla meblağ-ı bâkī-i mezbûru merkūmûn İsmail Beşe ve Veli’den kefâletlerine binâen taleb ederim. Suâl olunup alıverilmesi matlûbumdur dedikde, gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda udûl-i Müslimînden olup kazâ-i mezbûr ahâlîsinden İbrahim Bey b. Mehmed ve Ebubekir b. Mehmed ve İbrahim Ağa b. Mustafa nâm kimesneler li-ecli’ş-şehâde meclis-i şer‘e hâzirûn olup isre’l-istişhâd fi’l-vâki‘ müteveffâ-yı mezbûr Altıparmak Mustafa Beşe b. Mehmed’in müdde‘î-i merkūm Hasan Bey’e cihet-i deyn-i şer‘îden zimmetinde deyni olan meblağ-ı mezbûr beş yüz yirmi guruşa mezbûrûn İsmail Beşe ve Süleyman Beşe ve Veli tarafından emr ve kabûlü hâvî kefâlet-i sahîha-i şer‘iyye ile bizim huzûrumuzda kefil olmuşlar idi. Biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm meblağ-ı bâkī-i mezbûr üç yüz altmış guruşu müdde‘î-i mezbûr Hasan Bey’e edâya bi-hükmi’l-kefâle mezbûrûn İsmail Beşe ve Süleyman Beşe ve Veli’ye tenbîh birle mâ-vaka‘a bi’t-taleb ketb olundu. Fi’l-yevmi’s-sâbi ve’l-ışrîn min-Muharremü’l-haram li-sene sitte aşere ve mi’e ve elf. Şuhûdü’l-hâl: Hüseyin Efendi b. Himmet, İsmail Efendi el-kâtib, Ömer Efendi b. Ali, Veliyüddin Efendi el-kādî, Mehmed Efendi kâtib, el-Hâc Mustafa b. Hasan, el-Hâc Yusuf b. Osman.