Bab Mahkemesi 54 Numaralı Sicil (H. 1102 / M. 1691) cilt: 20, sayfa: 347 Hüküm no: 419 Orijinal metin no: [72b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aslan v. Salamon’un Ahmed Ağa b. Edhem’de olan ödünç alacağı hususunda onunla sulh olduğu Mahrûse-i Edirne’de sâkin Yahud tâifesinin Portakal Cemâ‘ati’nden olup, hâlâ kasaba-i Beşiktaş’da sâkin olan Sarraf Aslan v. Salamon meclis-i şer‘-i şerîf-i enverde, mahmiye-i İstanbul’da Haydarhâne mahallesinde sâkin olup, hâlâ kıbtiyân cizyedârı olan fahrü’l-eşbâh Ahmed Ağa b. Edhem tarafından husûs-ı âti’l-beyâna vekîl olduğu el-Hâc Ali Bey b. Hasan ve Bekir Sipâhi Hobyar şehâdetleriyle şer‘an sâbit olan Mehmed Çavuş b. Mustafa mahzarında ikrâr ve takrîr-i kelâm edip, müvekkil-i merkūm Ahmed Ağa zimmetinde cihet-i karzdan ve çuka bahâsından cem‘an üç yüz kırk guruş hakkım var deyu taleb ve da‘vâ eylediğimde, ol dahi inkâr etmekle, beynimizde münâza‘ât-ı kesîre vukū‘undan sonra muslihûn tavassut edip merkūm Ahmed Ağa benimle yedi bin akçe üzerine sulh oldukda, ben dahi sulhu kabûl ve bedel-i sulh olan meblağ-ı mezbûr yedi bin akçeyi ahz u kabz ettiğimden sonra husûs-ı mezbûre müte‘allika âmme-i da‘vâdan müvekkil-i merkūm Ahmed Ağa’nın zimmetini ibrâ-i âmla ibrâ ve iskāt eyledim, ol dahi benim zimmetimi kezâlik ibrâ ve iskāt eyledi dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: Hâfız Mustafa Çavuş b. ( ) el-mübâşir, Ömer Efendi b. Abdurrahman, Ali Efendi b. ( ) dânişmend, el-Hâc Ali Bey b. Hasan, Osman b. Hasan, Receb Bey sipâhi, İbrahim Çelebi b. Ahmed.