Bab Mahkemesi 54 Numaralı Sicil (H. 1102 / M. 1691) cilt: 20, sayfa: 347 Hüküm no: 420 Orijinal metin no: [72b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Çelebi b. Ahmed’in alacak iddiasının reddi Mahmiye-i İstanbul’da Ereğli mahallesi sâkinlerinden İsmail Çelebi b. Ahmed nâm kimesne meclis-i şer‘-i şerîf-i enverde, yine mahalle-i mezbûre sâkinlerinden İbrahim Çelebi b. Zülfikar mahzarında üzerine da‘vâ ve takrîr-i kelâm edip, mezbûr İbrahim Çelebi bundan akdem fuzûlen benim elli dokuz guruşumu ahz u kabz etmekle, hâlâ suâl olunup, meblağ-ı mezbûr elli dokuz guruşu bana red ve teslîme mezbûr İbrahim Çelebi’ye tenbîh olunmak matlûbumdur dedikde, [73a] gıbbe’s-suâl ve akībe’l-inkâr, müdde‘î-i mezbûr İsmail Çelebi’den vech-i meşrûh üzre müdde‘âsına beyyine taleb olundukda, ityân-ı beyyineden izhâr-ı acz edip istihlâf etmekle, fi’l-hakīka müdde‘î-i mezbûr İsmail Çelebi’nin ber vech-i muharrer elli dokuz guruşunu ahz u kabz etmeyip, ol vechile üzerine red ve damândan nesne lâzım gelmediğine mezbûr İbrahim Çelebi’ye yemîn teklîf olundukda, ol dahi hasbe’l-mes’ûl yemîn billâhi’l-aliyyi’l-a‘lâ etmeğin, mûcebiyle müdde‘î-i mezbûr İsmail Çelebi bilâ-beyyine bî-vech mu‘ârazadan men‘ olunup, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: Mustafa Efendi b. Musa el-imâm, el-Hâc Hüseyin [b.] Abdullah el-müezzin, Osman Çelebi b. Süleyman, İbrahim Çelebi b. Hüseyin.