Bab Mahkemesi 54 Numaralı Sicil (H. 1102 / M. 1691) cilt: 20, sayfa: 348 Hüküm no: 421 Orijinal metin no: [73a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia Hatun b. Mehmed’in kocasının Sakine Hatun Vakfı’na olan borcunu kefil olarak ödediği Mahmiye-i İstanbul’da vâki‘ Sâkine Hâtun Vakfı’na sâbıkan mütevellî olan Ahmed Çelebi b. Mehmed nâm kimesne meclis-i şer‘-i şerîf-i enverde, bâ‘isetü hâze’l-kitâb Râbia bt. Mehmed nâm hâtun mahzarında ikrâr ve takrîr-i kelâm edip, mezbûre Râbia’nın zevci gāib fi’l-meclis Sefer nâm kimesne mâl-ı vakf-ı mezbûrdan olmak üzre bundan dört top diba bahâsı ve nukūd cem‘an yüz seksen guruş edâ ve teslîm, ol dahi istidâne ve kabz ettiğinden sonra meblağ-ı mezbûr seksen guruş zevcesi işbu merkūme Râbia hâtun kefâlet-i sahîha-i şer‘iyye ile kefîl olmağla, hâlâ mezbûre Râbia Hâtun’dan kefâlet-i mahkiyesine binâ’en meblağ-ı mezbûr yüz seksen guruşu işbu meclis-i şer‘de bana edâ ve teslîm, ben dahi bi’t-tamâm ahz u kabz eyledim. Min ba‘d meblağ-ı mezbûrdan merkūme Râbia Hâtun’a ve zevci mezbûr Mustafa zimmetlerinde bir akçe ve bir habbe bâkī kalmadı dedikde, gıbbe’t-tasdîki’l-mer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cumâdelâhire sene 1102. Şuhûdü’l-hâl: Es-Seyyid Mustafa Efendi b. Mehmed el-imâm, Mustafa Çelebi b. Süleyman el-müezzin, İbrahim Çavuş b. Mustafa, es-Seyyid Ahmed Çelebi b. ( ), es-Seyyid Musa Ağa b. Hasan.