Bab Mahkemesi 54 Numaralı Sicil (H. 1102 / M. 1691) cilt: 20, sayfa: 348 Hüküm no: 422 Orijinal metin no: [73a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Ramazan’ın kaybolan ve Mihal v. Kostantin elinde bulunan beygirinin kendisine teslimi Ebnâ-yı sipâhiyândan olup mahmiye-i İstanbul’da Atmeydanı kurbunda müsâfiren sâkin Hasan Bey b. Ramazan meclis-i şer‘-i şerîf-i enverde, mahmiye-i mezbûrede Yenikapı dâhilinde sâkin Mihal v. Kostantin nâm zimmî tarafından husûs-ı âti’l-beyâna vekîl olduğu Ömer Çavuş b. Mahmud ve Ahmed b. Hasan şehâdetleriyle sâbit olan Preşkova v. Trandafil nâm zimmî muvâcehesinde üzerine da‘vâ ve takrîr-i kelâm edip, bundan akdem vilâyet-i Rumeli’nde vâki‘ Erdel’den gelir iken Bükreş Boğazı nâm mahalde işbu bir re’s kır Bârgirim mülkümden zâyi‘ olmuşidi. Hâlâ müvekkil-i Mihal yedinde buldum, suâl olunup mârru’z-zikr Bârgirimi bana teslîme mezbûr Preşkova’ya tenbîh olunmak matlûbumdur dedikde, gıbbe’s-suâl vekîl-i mezbûr Preşkova cevâbında, müvekkilim mezbûr Mihal mârru’z-zikr Bârgiri bundan akdem Eflak Beyi Kostantini’den semen-i ma‘lûme iştirâ ve kabz etmekle, mülk-i müşterâsı olmak üzre vaz‘-ı yed edip, müdde‘î-i mezbûrun ber vech-i muharrer mülkü olduğu ma‘lûmu değildir deyücek müdde‘î-i mezbûr Hasan Bey’den vech-i muharrer üzre beyyine taleb olundukda, ebnâ-yı sipâhiyândan Ahmed Bey b. Hasan ve Himmet Bey b. Mehmed nâm kimesneler meclis-i şer‘a hâzırân olup, fi’l-vâki‘ bundan akdem vilâyet-i Rumeli’nde vâki‘ Erdel’den gelir iken Bükreş Boğazı nâm mahalde işbu bir re’s kır Bârgir müdde‘î-i mezbûr Hasan Bey’in yedinde mülkü olduğu hâlde zâyi‘ olmuşidi. Biz bu husûsa bu vech üzre şâhidleriz, şehâdet dahi ederiz deyu her biri edâ-yı şehâdet-i şer‘iyye eylediklerinde, gıbbe ri‘âyet-i şerâiti’l-kabûl şehâdetleri makbûle oldukdan sonra müdde‘î-i mezbûr Hüseyin Bey tahlîf-i şer‘î ile tahlîf olundukdan sonra mârru’z-zikr Bârgiri müdde‘î-i mezbûra teslîme vekîl-i mezbûr Preşkova zimmîye tenbîh olunup, mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cumâdelâhire li sene 1102. Şuhûdü’l-hâl: İbrahim Çelebi b. Ahmed, Mustafa b. Şaban, Ömer Çavuş b. Mehmed, Hüseyin b. Mustafa, Ahmed b. Ahmed ve gayruhüm.