Bab Mahkemesi 54 Numaralı Sicil (H. 1102 / M. 1691) cilt: 20, sayfa: 349 Hüküm no: 423 Orijinal metin no: [73a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Veli Beşe b. Ramazan’ın varislerinin kendilerine intikal eden menzil arsasını Pako v. Avram’a satması Mahmiye-i İstanbul’da Üskübî mahallesinde sâkin iken bundan akdem vefât eden el-Hâc Veli Beşe b. Ramazan’ın verâseti, zevce-i metrûkesi Ayşe bt. Osman nâm hâtun ile sulbî kebîr oğlu Abdullah ve sulbiye kebîre kızları Fâtıma ve Emine nâm hâtunlara münhasıra olup, kable’l-kısme mezbûre dahi vefât edip, verâseti zevci Hüseyin Çavuş b. Abdullah ve sadriye sagīre kızı Sâliha ve mezbûrân Abdullah ve Fâtıma’ya münhasıra olup, kable’l-kısme mezbûr Hüseyin Çavuş dahi vefât edip, verâseti sulbiye kızı mezbûre Sâliha’ya ve li ebeveyn er karındaşı Mustafa Çelebi b. Mehmed’e münhasıra ve tashîh-i mes’elesi bi tarîki’l-münâsahati’ş-şer‘iyye yedi yüz altmış sekiz sehimden olup, sihâm-ı mezbûreden doksan altı sehimi mezbûre Ayşe’ye ve üç yüz altmış dört sehimi mezbûr Abdullah Çelebi’ye ve yüz seksen iki sehimi mezbûre Fâtıma’ya ve yüz beş sehimi sagīre-i mezbûre Sâliha’ya ve yirmi bir sehimi mezbûr Mustafa’ya isâbet ve intikāl eylediği şer‘an [73b] zâhir ve mütehakkik oldukdan sonra mezbûr Abdullah asâleten ve mezbûretân Ayşe ve Fâtıma nâm hâtunlar tarafından husûs-ı âti’l-beyâna vekîl-i şer‘îsi olan Mustafa Çelebi b. el-Hâc Musa meclis-i şer‘-i şerîf-i enverde Tercüman Pako v. Avram nâm Yahudi mahzarında ikrâr-ı tâm ve takrîr-i kelâm edip, müteveffâ-yı mezbûr el-Hâc Veli Beşe ile’l-vefât yedinde mülk ve hakkı olup, mahmiye-i mezbûre ebvâbından Balatkapısı hâricinde Karabaş mahallesinde vâki‘ bir tarafdan zimmî Papas mülkü ve bir tarafdan Hasköylü mülkü ve bir tarafdan leb-i deryâ ve bir tarafdan ba‘zan el-Hâc Mehmed mülkü ve ba‘zan tarîk-i âm ile mahdûd mülk menzil arsasında olan ber vech-i [muharrer] hisse-i şâyi‘amızı cemî‘ tevâbi‘i ile tarafeynden îcâb ve kabûlü hâvî bey‘-i kat‘î ile mezbûr Pako’ya yirmi altı bin seksen altı akçeye bi’l-asâle ve bi’l-vekâle bey‘ ve temlîk ve teslîm, ol dahi ber vech-i muharrer iştirâ ve temellük ve tesellüm ve kabûl ettiğinden sonra semeni olan meblağ-ı mezbûr yirmi altı bin seksen altı akçeyi mezbûr Pako’nun yedinden bi’t-tamâm ahz u kabz eyledik. Ba‘de’l-yevm arsa-i mezbûrede olan hisse-i şâyi‘a alâka ve medhalimiz kalmayıp, Pako’nun mülk-i müşterâsı olmuşdur dediklerinde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Cumâdelâhire sene 1102. Şuhûdü’l-hâl: İbrahim Çelebi b. Ahmed, diğer İbrahim Çelebi b. Mehmed, Ali Efendi b. el-Hâc Kâtib, İsmail b. Mustafa, Hüseyin b. Halil.