Bab Mahkemesi 54 Numaralı Sicil (H. 1102 / M. 1691) cilt: 20, sayfa: 350 Hüküm no: 424 Orijinal metin no: [73b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Büyükçekmece Sürgün köyü halkı ile kendilerinden haksız yere para alan mütevelli Veli Bey b. Şükrullah’ın sulh olması Havâss-ı Aliyye kazâsında Büyü[k]çekmece nâhiyesine tâbi‘ Sürgün nâm karye ahâlîsinden Lika v. Yorgi v. Andriye ve Noriş v. Yorgi ve İspilyot v. Hristo ve Kaminonoz v. Dimitraki ve Anton v. Yorgi ve Dimitri v. Dimo ve Dimitri v. Yorgi ve Yorgi v. Dimo ve Dimo v. İzmo nâm zimmîler meclis-i şer‘-i şerîf-i enverde, merhûm Musâhib İsmail Ağa ve Çırağan Mehmed Ağa’nın mahmiye-i İstanbul’da Saray-ı cedîd-i sultânî’de vâki‘ odun anbarı mühimmâtına mevkūfe nukūda mütevellî olan bâ‘isü hâze’l-kitâb Veli Bey b. Şükrullah nâm kimesne mahzarında her biri ikrâr ve takrîr-i kelâm edip, mezbûr Veli Bey karye-i mezbûre ahâlîsinden sizin babalarınız vakfeyn-i mezbûreyn mâlından dört yüz guruşdan iki yüz akçe eksik guruş istidâne ve kabz etmişidi deyu otuz seneden beri bizden meblağ-ı mezbûrun murâbahası deyu senede altmışar guruşdan otuz senede bin sekiz yüz guruşumuzu deynimiz yoğiken bi gayri hakkın ahz u zabt etmekle, ber vech-i muharrer makbûzu olan meblağ-ı mezbûr bin sekiz yüz guruşu mezbûr Veli Bey’den da‘vâ ve müdde‘âmızı dahi huzûr-ı hâkimü’ş-şer‘de isbât dahi etmekle, muslihûn tavassut edip da‘vâ-yı mezkûremizden bizi mezkûr Veli Bey ile meblağ-ı mezbûr bin sekiz yüz guruşun dört yüz guruşu mütevellî-i mezbûrun asıl mâl-ı vakf-ı mezbûr deyu iddi‘â eylediği dört yüz guruşa takās, ol dahi mukāssa ve kabûl edip mâ‘adâsından yüz guruş üzerine beynimizde akd-i musâlaha eylediklerinde merkūm Veli Bey dahi meblağ-ı mezbûr müsbet olmağla, vech-i meşrûh üzre sulh taraf-ı vakfa her vechile enfa‘ ve evlâ olmağın, sulh-ı mezbûru vech-i meşrûh üzre kabûl ettiğinden sonra bedel-i sulh olan meblağ-ı mezbûru cümlemiz merkūm Veli Bey’den bi’t-tamâm ahz u kabz edip meblağ-ı mezbûra müte‘allika cemî‘-i da‘vâdan biz mütevellî-i mezbûrun zimmetini ve taraf-ı vakf-ı mezbûru ibrâ-i â[mm]-ı kātı‘ü’n-nizâ‘la ibrâ ve iskāt edip ve mesfûr Veli Bey dahi kezâlik makbûz-ı mezkûra ve bedel-i sulh olan meblağ-ı mezbûra müte‘allika cemî‘-i da‘vâdan bizim ve karye-i mezbûrenin sâir ahâlîsinin zimmetlerimizi ibrâ ve iskāt eyledi. Ba‘de’l-yevm biribirimiz ile da‘vâ ve nizâ‘ımız kalmadı dediklerinde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: Yahya Efendi b. Ahmed tâbi‘-i efendi, Müezzin Mehmed Çelebi tâbi‘-i Efendi, Muhzırbaşı vekîli el-Hâc Mustafa Ağa, Davud Ağa [b.] Mustafa Kethüdâ Efendi, Muhzır Mustafa b. Şaba[n] Galatalı, Yahya Çelebi tâbi‘-i nâib efendi, Çivizâde Mahallesi imâmı Mehmed Efendi b. Ömer, Esad Efendi Davu[d]zâde?, İbrahim Çavuş el-mübâşir, Mustafa Çelebi b. Mehmed kuloğlanı.