Bab Mahkemesi 54 Numaralı Sicil (H. 1102 / M. 1691) cilt: 20, sayfa: 351 Hüküm no: 425 Orijinal metin no: [73b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı İsmail Ağa b. Hacı Hasan’ın Seyyid Hasan Çelebi b. Seyyid Mehmed Efendi’ye olan borcunu ödemesi Mahmiye-i İstanbul’da Haydarhâne mahallesi sâkinlerinden bâ‘isü hâze’l-kitâb es-Seyyid Hasan Çelebi b. es-Seyyid Mehmed nâm kimesne meclis-i şer‘-i şerîf-i enverde, Solakzâde el-Hâc İsmail Ağa b. el-Hâc Hasan nâm kimesne mahzarında üzerine da‘vâ ve takrîr-i kelâm edip, târih-i kitâbdan altı sene mukaddem mezbûr el-Hâc İsmail Ağa’nın vilâyet-i Anadolu’da Perşembe kazâsı sâhilinde müceddeden binâ ettirdiği şayka ta‘bîr olunur sefîne ustalarından Ahmed Reis b. Abdullah ve Mustafa Reis b. Abdullah nâm kimesnelere her iki batmanı birer guruş olmak üzre yüz otuz altı batman demirini bey‘ ve teslîm ile, semenine ben kendi mâlımdan zâminim deyu bana emr etmekle, ben dahi mezbûrun emrine binâ’en vech-i muharrer üzre her iki batmanı birer guruşa olmak üzre yedimde mülküm olan yüz otuz altı batman demirimi altmış sekiz esedî guruşa bey‘ ve teslîm, mezbûrân Ahmed Reis ve Mustafa Reis dahi iştirâ ve kabûl ve kabz ve sefîne-i mezbûreye harc u sarf ile istihlâk etmişler idi. Hâlâ merkūm el-Hâc İsmail Ağa’ya suâl olunup ber vech-i meşrûh [74a] emr-i mezbûruna binâ’en semen-i mezbûr altmış sekiz esedî guruşu bana edâ ve teslîm tenbîh olunmak matlûbumdur dedikde, gıbbe’s-suâl ve akībe’l-inkâr müdde‘î-i mezkûrdan müdde‘âsına beyyine taleb olundukda, udûl-i müslimînden olup zikr olunan Haydarhâne mahallesinde sâkin es-Seyyid Veli Çelebi b. Osman ve Hüseyin b. Himmet ve es-Seyyid Nurullah b. eş-Şeyh Mahmud nâm kimesneler li ecli’ş-şehâde meclis-i şer‘a hâzırûn olup isre’l-istişhâd, fi’l-hakīka târih-i kitâbdan altı sene mukaddem işbu mezbûr el-Hâc İsmail Ağa her iki batmanı birer guruşa olmak üzre yüz otuz altı batman demiri merkūmân Ahmed Reis b. Abdullah ve Mustafa Reis b. Abdullah’a bey‘ ve teslîm ile semenine ben mâlımdan zâminim deyu müdde‘î-i mezbûr es-Seyyid Hasan Çelebi’ye bizim huzûrumuzda emir edip, merkūm dahi mezbûr el-Hâc İsmail Ağa’nın emr-i mezbûruna binâ’en vech-i muharrer üzre her iki batmanı birer guruşa olmak üzre yüz otuz batman demirini merkūmân Ahmed Reis ve Mustafa Reis altmış sekiz guruşa bey‘ ve teslîm, onlar dahi iştirâ ve kabz ve sefîne-i mezbûreye sarf etmişler idi. Biz bu husûsa bu vech üzre şâhidleriz, şehâdet dahi ederiz deyu her biri edâ-yı şehâdet-i şer‘iyye ettiklerinde, gıbbe’t-ta‘dîl ve’t-tezkiye şehâdetleri makbûle olmağın, mûcebiyle ba‘de’l-hükm semen-i mezbûr altmış sekiz guruşa müdde‘î-i mezbûr es-Seyyid Hasan Çelebi’ye edâ ve teslîme merkūm el-Hâc İsmail Ağa’ya tenbîh olunup, mâ vaka‘a bi’t-taleb ketb olundu. Fi’l-yevmi’s-sânî aşer min Cumâdelâhire sene 1102. Şuhûdü’l-hâl: Es-Seyyid Mahmud Efendi b. es-Seyyid Osman, es-Seyyid Abdurrahman Efendi, Ahmed Çelebi b. Mehmed, Ahmed Efendi b. Mahmud, Abdurrahim Çelebi b. Hüseyin.