Bab Mahkemesi 54 Numaralı Sicil (H. 1102 / M. 1691) cilt: 20, sayfa: 352 Hüküm no: 426 Orijinal metin no: [74a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Ahmed Paşa’nın çiftlik, yurt ve tarlalarını Hacı Ahmed Paşa b. Ali Bey’e satması Sâbıkan deryâ beylerinden olan Mehmed Bey b. Ahmed Paşa nâm kimesne meclis-i şer‘-i şerîf-i enverde, ümerâ-yı deryâ[da]n ve mefharu’l-emâcid ve’l-ekârim bâ‘isü hâze’l-kitâb el-Hâc Ahmed Paşa b. Ali Bey mahzarında ikrâr ve takrîr-i kelâm edip, silk-i mülkümde münselik olup, vilâyet-i Rumeli’nde Eğriboz sancağında İstefe nâhiyesine tâbi‘ Koknoz nâm karyede vâki‘ lede’l-ahâlî ve’l-cîrân ma‘lûmü’l-hudûd çiftlik ta‘bîr olunur mülk menzilimi ve yine nâhiye-i mezbûrede vâki‘ Marinoz ve Sihne? ve Birgoz nâm mülk çiftliklerimi ve mülk yurd yerlerini ve iki yüz seksen keyl hınta ve yüz yirmi keyl şa‘îrimi ve İstefe kasabası kurbunda Hürrem Voyvada Çiftliği ta‘bîr olunur mülk menzilimi ve dâhilinde vâki‘ harman yeri ve yurd yerlerini ve Kabadil nâm mevzi‘de vâki‘ çiftlik ta‘bîr olunur menzil ve yurd yeri ve harman yerlerini cemî‘-i tevâbi‘ ve levâhıkı ile müşârün-ileyh el-Hâc Ahmed Paşa’ya tarafeynden îcâb ve kabûlü hâvî bey‘-i kat‘î ile beş yüz elli guruşa bey‘ ve temlîk ve zikr olunan Koknoz nâm karyede vâki‘ ma‘lûmetü’l-hudûd ve’l-kat‘ on beş çift saban yürür tarlalarımı ve mârru’z-zikr Sihne? ve Marinoz ve Birgoz’da vâki‘ on yedi çift saban yürür tarlalarımı ve İstefe kurbunda vâki‘ çiftlik-i mezkûra teba‘iyyet ile zirâ‘at olunan dört çift [saban] yürür tarlalarımı ve Kabadil’de bir çiftlik tarlalarımı dahi mûmâ-ileyh el-Hâc Ahmed Paşa’ya ma‘rifet-i sâhib-i arz ile beş yüz guruş bedel mukābilesinde ferâğ ve tefvîz, ol dahi minvâl-i meşrûh üzre iştirâ ve temlîk ve tefevvüz ve kabûl ettiğinden sonra semen-i mezkûr beş yüz elli guruş ile bedel-i merkūm beş yüz guruş ki, min haysü’l-mecmû‘ bin elli guruşa müşârün-ileyh el-Hâc Ahmed Paşa’dan bi’t-tamâm ahz u kabz edip, emlâk-i mezkûreyi ve tarlaları mahallinde kabza taslît eyledim. Ba‘de’l-yevm zikr olunan çiftlikler ve harman yerleri ve yurd yerleri mûmâ-ileyh el-Hâc Ahmed Paşa’nın mülk-i müşterâsı ve tarlalar hakk-ı müfevvazı olmuşdur. Keyfe mâ yeşâ ve yahtâr mutasarrıf olsun dedikde, gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cumâdelâhire sene 1102. Şuhûdü’l-hâl: Es-Seyyid İbrahim Çelebi Sakızlı, Halil Ağa Sakızlı, Mehmed Bey Anabolu, el-Hâc Ömer abacı, el-Hâc Hasan Çelebi, Mehmed Efendi Şeyhzâde, Receb Efendi kâtib-i kassâm, Veli Efendi sahhâf.