Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 191 Hüküm no: 132 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaz Ahmed Beşe’nin terekesinin vasisi Veli Beşe tarafından varislerinin vekili Mehmed’e teslimi Vilâyet-i Rumeli’nde bi’l-fi‘il Kalkandelen kādısı olan Muharrem Efendi b. Ramazan b. Halil’in imzâ ve hatemini hâvî ve târîh-i kitâb senesi Muharremü’l-haramının yirmi sekizinci günü târîhiyle müverrah nakl-i şer‘î vârid olup mazmûnu medîne-i Kalkandelen mahâllâtından Ahmed Bey mahâllesi sâkinlerinden Ali ve İbrahim nâm sagīrlerin vâlideleri ve tesviye-i umûrlarına kıbel-i şer‘den mansûb vasîleri olan Afife bt. Mehmed b. Mehmed ile Hadîce bt. Ahmed b. Ali nâm hatunlardan ber-vech-i âtî da‘vâ-i sahîha-i şer‘iyye ile mesbûk istişhâd-ı şer‘î sudûrundan sonra udûl-i ahrâr-ı ricâl-i Müslimînden olup mahâlle-i mezbûre ahâlîsinden Mehmed Halîfe b. İlyas b. Mustafa ve Hüseyin Sipâhî b. Ahmed b. Ramazan nâm kimesnelere nakl ve tahvîl için li-ecli’ş-şehâde mahâll-i cerh ve ta‘dîle hâzırân olup şöyle edâ-yı şehâdet-i şer‘iyye eylediler ki fi’l-asl kasaba-i mezbûrede mahâlle-i mezbûre sâkinlerinden olup mahmiye-i İstanbul’da Sultân Mehmed Câmi‘-i şerîfi kurbünde Atpazarı’nda sâkin ve Dergâh-ı âlî yeniçerilerinin Otuzuncu Ağa Bölüğü camcıları odasına mahsûs orta neferâtından iken bundan akdem fevt olup terekesi veresesine îsâl için vasiyy-i muhtârı yedinde mazbûta idüğü istimâ‘ımız olan Canbaz Ahmed Beşe b. Ali b. Ahmed nâm kimesnenin müsteşhide-i mezbûre Afife zevce-i menkûha-i metrûkesi olup ve sagīrân-ı mezbûrân Ali ve İbrahim mezbûr Ahmed Beşe’nin firâşından hâsıl ve zevcesi mezbûre Afife’den mütevellid sulbî oğulları olup ve mezbûre Hadîce bt. Ahmed b. Ali müteveffâ-yı mezbûr Ahmed Beşe’nin vâlidesi ve maskat-ı re’sleri mahâlle-i mezbûre olmağla hâlâ müteveffâ-yı mezbûrun verâseti ber-vech-i muharrer zevce-i menkûha-i metrûkesi mezbûre Afife’ye ve sulbî sagīr oğulları mezbûrân Ali ve İbrahim’e ve vâlidesi mezbûre Hadîce’ye münhasıradır, bunlardan gayrı vârisi ve terekesine müstahıkk-ı âharı olduğu ma‘lûmumuz değildir müteveffâ-yı mezbûrun terekesini kabz eden vasiyy-i muhtârından ve sâir vâzı‘ü’l-yed olanlardan mezbûrûn için hakk-ı taleb ve ahz vardır, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mezbûre Afife asâleten ve vesâyeten ve merkūme Hadîce dahi asâleten müteveffâ-yı mezbûrun terekesini kabz eden vasiyy-i muhtârından ve sâir vâzı‘ü’l-yed olanlardan taleb ve da‘vâ ve ahz u kabza ve kendülere îsâle ve husûs-ı mezbûr mütevakkıf olduğu umûrun küllîsine işbu nâkilü’l-kitâb Mehmed b. Mehmed nâm kimesneyi tarafından vekîl ve nâib-i menâb nasb u ta‘yîn edip ol dahi vekâlet-i mezbûreyi kabûl eylediğini hâvî bulunmağın kitâb-ı mezbûr vekîl-i merkūm talebiyle mahmiye-i İstanbul’da meclis-i şer‘de müteveffâ-yı mezbûrun vasiyy-i muhtârı olup terekesine vâzı‘ü’l-yed olan Veli Beşe b. Ali nâm kimesne mahzarında feth ü kırâet ve istintâk olundukda mezbûr Veli Beşe tereke-i müteveffâ-yı mezbûra bi’l-vesâye vaz‘-ı yedini ikrâr lâkin kitâb-ı mezbûr mevlânâ-yı mezbûr kıbelinden vürûdunu inkâr edicek mezbûr Mehmed’den kitâb-ı mezbûr [40b] mevlânâ-yı mezbûr kıbelinden vürûduna beyyine taleb olundukda udûl-i ahrâr-ı ricâl-i Müslimînden olup kitâb-ı mezbûrun zeylinde isimleri mastûr şuhûd-ı tarîkden İsmail b. Mustafa b. Hasan ve el-Hâc Ramazan b. Mustafa b. Hüseyin nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ kitâb-ı mezbûr bi’l-fi‘il Kalkandelen kādısı olan Mevlânâ Muharrem Efendi b. Ramazan b. Halil kıbelinden vârid olup kitâb-ı mezbûru mevlânâ-yı mezbûr muvâcehemizde feth ü kırâet edip bizim huzûrumuzda imzâ edip mühürleyip biz kitâb-ı mezbûrun zeylinde olan imzâ ve zahrında olan hatem mevlânâ-yı mezbûrun imzâ ve hatemi olduğuna şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm tereke-i müteveffâ-yı mezbûru vekîl-i merkūm Mehmed’e teslîm etmek üzere mezbûr Veli Beşe’ye tenbîh birle mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: Hüseyin Efendi b. Himmet, İsmail Efendi el-kâtib, Ömer Efendi b. Ali, Veliyüddin Efendi el-kādı, Mehmed Emin Efendi el-kâtib, el-Hâc Yusuf.