Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 193 Hüküm no: 133 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb Efendi’nin menzil ve müştemilatını İstanköy eski kadısı Hasan Efendi’ye istiğlal yoluyla satması Mahmiye-i İstanbul’da Edirnekapısı dâhilinde Keçeci Pîrî mahâllesi sâkinlerinden olup muvakkaten Ahyolu kādısı olan Receb Efendi b. Ahmed nâm kimesne mahmiye-i mezbûrede meclis-i şer‘de sâbıkā İstanköy kādısı olan Hasan Efendi b. ( ) nâm kimesne mahzarında ikrâr ve takrîr-i kelâm edip mahâlle-i mezbûrede vâki‘ bir tarafdan ba‘zan Gevher nâm hatun mülkü ile ba‘zan İsmail Efendi mülkü ve bir tarafdan odalar ve taraf-ı râbii tarîk-i âm ile mahdûd hâricen iki bâb fevkānî oda ve ahır ve dâhilen iki bâb fevkānî oda ve dehliz ve harâbe hamam ve bir matbâh ve mahtab-hâne ve eşcâr-ı müsmire ve gayr-ı müsmireyi hâvî bahçeyi müştemil mülk menzilimi mezbûr el-Hâc Hasan Efendi’ye iki yüz guruşa bi-tarîkı’l-istiğlâl bey‘ ve teslîm, ol dahi ber-vech-i muharrer iştirâ ve tesellüm ve kabz ve kabûl eyleyip semeni olan meblağ-ı mezbûr iki yüz guruşu merkūm el-Hâc Hasan Efendi bana def‘ ü teslîm ben dahi yedinden tamâmen ahz u kabz eylediğimden sonra merkūm Hasan Efendi ba‘de’t-tahliyeti ve’t-takābuz yine menzil-i mezkûru târîh-i kitâbdan bir seneye değin yirmi guruşa bana icâr, ben dahi isticâr ve kabûl eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 27 min-Saferi’l-hayr sene 1116 Şuhûdü’l-hâl: Veliyüddin Efendi el-kādı, Ahmed Efendi el-kādı, Ali Çelebi b. Mehmed, İbrahim Çelebi Camcızâde, Mustafa Çelebi berber, Ahmed Bey b. Ali, Mustafa Çelebi b. Ahmed, el-Hâc Yusuf.