Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 193 Hüküm no: 134 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’ye borcu olan Bedri Ahmed’e borcunu ödemesi hususunda tenbihte bulunulması Mahmiye-i İstanbul’da Alipaşa-i atik mahâllesinde sâkin ve Mısır kuzâtından fahrü’l-kuzât Mehmed Efendi b. Rasul tarafından husûs-ı âti’l-beyana vekîl olduğu nehc-i şer‘î üzere sâbit olan Hüseyin b. Abdullah nâm kimesne mahmiye-i mezbûrede meclis-i şer‘de sâbıkā Antakya kādısı olan Müftîzâde demekle ma‘rûf Bedri Ahmed Efendi b. Mehmed mahzarında bi’l-vekâle üzerine da‘vâ ve takrîr-i kelâm edip müvekkil-i mezbûrun mezbûr Ahmed Efendi zimmetinde işbu memhûr deyn temessükü nâtık olduğu üzere dört yüz elli guruş ve kezâlik işbu bir kıt‘a temessük mûcebince dahi yedinden iştirâ ve kabz eylediği bir re’s bargir bahasından on yedi guruş hakkı olup meblağ-ı mezbûrun merkūm Ahmed Efendi yedinden bi’d-defa‘ât iki yüz doksan yedi guruşunu müvekkil-i mezbûr ahz u istifâ edip meblağ-ı mezbûr dört yüz elli guruşdan bâkī kalan yüz elli üç guruşu hâlâ merkūm Ahmed Efendi’den bi’l-vekâle taleb ederim suâl olunsun dedikde, gıbbe’s-suâl mezbûr Ahmed Efendi cevâbında fi’l-vâki‘ müvekkil-i mezbûr Mehmed Efendi’ye zimmetinde meblağ-ı mezbûr dört yüz elli guruşdan makbûzu olan iki yüz doksan yedi guruşdan bâkī yüz elli üç guruş ile yedinden iştirâ ve kabz eylediği bargir semeninden on yedi guruş ki cem‘an yüz yetmiş guruş deyni olduğunu ikrâr u i‘tirâf etmeğin alâ-mûcib-i i‘tirâfihî meblağ-ı mezbûr yüz yetmiş guruşu vekîl-i mezbûra teslîm etmek üzere merkūm Ahmed Efendi’ye tenbîh birle mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Saferi’l-hayr sene 1116. Şuhûdü’l-hâl: İsmail Efendi el-kâtib, Mustafa Efendi b. Mehmed, Mehmed Efendi b. Hacızâde, el-Hâc Yusuf b. Osman.