Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 194 Hüküm no: 135 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kivana bt. Todori’nin Uncu Mihal aleyhindeki alacak davasının reddedilmesi Fi’l-asl vilâyet-i Rumeli’nde Mora sancağında Mizistre kazâsına tâbi‘ Prastos nâm karye ahâlîsinden mahmiye-i İstanbul’da Unkapanı kurbünde sâkin iken bundan akdem hâlik olan Uncu Nikola v. Todori nâm zimmînin verâseti li-ebeveyn kız karındaşı Kivana bt. Todori nâm Nasrâniyeye ve li-ebeveyn er karındaşı oğulları Todori ve Yani veledey Yorgi nâm zimmîlere münhasıra olduğu şer‘an sâbit ü zâhir oldukdan sonra zâtı ta‘rîf-i şer‘î ile mu‘arrefe olan mezbûre Kivana mahmiye-i mezbûrede meclis-i şer‘-i hatîrde hâlik-i mezbûrun terekesini kabz ve veresesine îsâle vasiyy-i muhtârı olmağla bi’l-vesâye tereke-i hâlik-i mezbûra vâzı‘ü’l-yed olan işbu bâ‘isü’s-sifr Uncu Mihal v. Todori nâm zimmî muvâcehesinde üzerine da‘vâ ve takrîr-i kelâm edip karındaşım mezbûr Uncu Nikola [41a] hâlik oldukda ben âhar diyârda bulunmak ile mezbûr Mihal tereke-i hâlik-i mezbûrdan ber-mûceb-i defter-i kassâm bi’l-vesâye makbûzu olan para üçer akçe hesâbı üzere cem‘an kırk dört bin beş yüz elli akçenin nısfı olup bana isâbet eden yetmiş iki bin iki yüz yetmiş beş akçeyi mezbûr Mihal bana def‘ ü teslîm ben dahi yedinden tamâmen ahz u kabz edip meblağ-ı mezbûrdan yedinde bir akçe kalmamış idi. Lâkin mezbûr Mihal hâlik-i mezbûrun metrûkâtından bi’l-vesâye hâric ez-defter bir bakraç ve bir kebe ve bir velence ve bir ağaç sandık ve zimem-i nâsdan dahi iki yüz guruş cem‘ ve tahsîl ve ahz u kabz etmekle hâlâ mezbûr Mihal’den eşyâ-yı mezbûre ile meblağ-ı mezbûr iki yüz guruşdan bana isâbet eden hissemi taleb eylediğimde teslîmden imtinâ‘ eder, suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘iye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin, fi’l-hakīka hâlik-i mezbûrun metrûkâtından defter-i kassâmdan hâric zikr olunan bakraç ve kebe ve velence ve sandığı ve zimemden dahi meblağ-ı mezbûr iki yüz guruşu ahz u kabz etmeyip ol vechile müdde‘iye-i mezbûreye reddi lâzım üzerinde hakkı olmadığına mezbûr Mihal’e yemîn teklîf olundukda ol dahi alâ-vefkı’l-mesûl yemîn billâhillezî enzele’l-İncîle alâ-İsâ -aleyhi’s-selâm- etdikde mûcebiyle müdde‘iye-i mezbûre bilâ-beyyine bî-vech mu‘ârazadan men‘ olunup mâ-vaka‘a bi’t-taleb ketb olundu. Fî 24 min-Saferi’l-hayr sene 1116. Şuhûdü’l-hâl: Hüseyin Efendi b. Himmet, İsmail Efendi kâtib, Ömer Efendi el-kâtib, Veliyüddin Efendi el-kādî, Emin Mehmed Efendi kâtib.