Bab Mahkemesi 54 Numaralı Sicil (H. 1102 / M. 1691) cilt: 20, sayfa: 353 Hüküm no: 427 Orijinal metin no: [74a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülistan bt. Abdullah’ın mallarını Hasan Çelebi’ye satması ve borcuyla takas etmesi Mahmiye-i İstanbul’da Mi‘mâr Sinan mahallesi sâkinelerinden olup zâtını ta‘rîf-i şer‘î ile ârifân Ahmed b. Mehmed? ve Yusuf Beşe b. Abdullah nâm kimesneler ta‘rîfleriyle mu‘arrefe olan Gülistan bt. Abdullah nâm hâtun meclis-i şer‘-i şerîfde, hâlâ menzilinde sâkine olduğum işbu bâ‘isü’l-kitâb Hasan Çelebi b. Mehmed nâm kimesneye cihet-i deyn-i şer‘îden yirmi guruş deynim olmağla, eşyâ-yı memlûkemden bir tencere ma‘a kapak ve iki Yanbolu keçesi ve bir yemeni yorgan ve iki yemeni yasdık ve bir alaca kaftan ve bir entari ve üç cedîd gömlek ve üç cedîd gömlek-i ib[ri]şimi merkūm Hasan Çelebi’ye yirmi esedî guruşa bey‘ ve teslîm ve semen-i mezbûru deynim olan yirmi guruşa takās, mezbûr Çelebi dahi ber vech-i muharrer iştirâ ve tesellüm ve mukāssa ve kabûl ettiğinden sonra bi emrillâhi te‘âlâ fevt olduğumda sâkine olduğum menzilde hâlâ melbûs olan libâsımdan gayrı ism-i mâl ıtlâk olunur bir akçe ve bir habbe mülk ve mâlım yokdur dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurre-i Recebi’l-ferd li sene isneteyn ve mi’e ve elf. Şuhûdü’l-hâl: Ali Çelebi b. Sunullah, Murtaza Çelebi b. İshak, İbrahim Çelebi b. Ahmed, Osman Beşe b. Hasan.