Bab Mahkemesi 54 Numaralı Sicil (H. 1102 / M. 1691) cilt: 20, sayfa: 353 Hüküm no: 428 Orijinal metin no: [74b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Süleyman’ın menzilini Yeniçeriler 12. cemâat para vakfına bey‘ bi’l-istiğlâl yoluyla satması ve borcunu ödemek için ilave vade alması Dergâh-ı âlî -dâme merci‘an li’l-e‘âlî- yeniçerilerinin Onikinci Cemâ‘ati’ne mahsûs oda ahâlîsinin mühimmâtına mevkūfe nukūda hâlâ mütevellî olan Mehmed Çelebi b. Mustafa Efendi meclis-i şer‘de, mahmiye-i İstanbul’da Veled-i Karabaş mahallesinde sâkin Mehmed Çelebi b. Süleyman mahzarında bi’t-tevliye üzerine da‘vâ ve takrîr-i kelâm edip, mezbûr Mehmed Çelebi bin doksan dokuz senesi şehr-i Ramazânü’l-mübârekin on altıncı günü silk-i mülkünde münselik olup, mahalle-i mezbûrede vâki‘ ma‘lûmü’l-hudûd menzilini târih-i mezbûrda vakf-ı mezbûra mütevellî olan el-Hâc Ömer b. Hasan’a üç yüz guruşa bi tarîki’l-istiğlâl bey‘ ve teslîm, ol dahi mâl-ı vakf-ı mezbûr ile iştirâ ve teslîm-i semen ettiğinden sonra yine mütevellî-i mezbûr menzil-i mezbûru ba‘de’t-tahliye ve’t-tekābuz sene-i mezkûrda vâki‘ Ramazân-ı şerîfin on sekizinci gününden iki sene tamâmına değin beher senesi otuzar guruşdan altmış guruşu yine mezbûr Mehmed Çelebi’ye îcâr ve teslîm, ol dahi istîcâr ve kabûl ve kabz etmişidi. Müddet-i mezkûre münkaziye olmağın, hâlâ suâl olunup asl-ı mâl-ı mezbûr ile seneteyn-i mezkûreteynde vâki‘ ücretden altmış guruş ki, cem‘an üç yüz altmış guruş vakıf için bana edâ ve teslîmine tenbîh olunmak matlûbumdur deyip mazmûnu min külli’l-vücûh takrîr-i meşrûhuna mutâbık hüccet-i şer‘iyye dahi ibrâz etmeğin, gıbbe’s-suâl mezbûr Mehmed Çelebi cevâbında, fi’l-hakīka hâl bâlâda şerh ve beyân olunan minvâl üzre olup, asl-ı mâl-ı vakf-ı mezbûr ile ücret-i mezkûre min haysü’l-mecmû‘ üç yüz altmış guruş zimmetinde lâzımü’l-edâ ve vâcibü’l-kazâ deynimdir deyu tav‘an ikrâr ve i‘tirâf etmeğin, alâ mûcebi i‘tirâfihî meblağ-ı mezbûru vakıf için mütevellî-i mezbûra edâ ve teslîme ba‘de’t-tenbîh mezbûr Mehmed Çelebi meclis-i şer‘de mütevellî-i mezbûr Mehmed Çelebi mahzarında takrîr-i kelâm edip, bâlâda tafsîl olunan minvâl üzre edâsına hükm-i şer‘î lâhık olan meblağ-ı mezbûr üç yüz altmış guruşu târih-i kitâbdan altmış gün tamâmına değin edâ ve teslîm edemezsem menzil-i mezkûru semen-i misli ile âhara bey‘ ve semeninden deyn-i mezbûru vakıf için istîfâ edip fazla kalırsa bana îsâle ve husûs-ı mezbûr mütevakkıf olduğu umûrun küllîsine azl ve in‘izâlden masûne vekâlet-i devriye ile yine mezbûr Mehmed Çelebi’yi tarafımdan vekîl ve nâib-i menâb nasb ve ta‘yîn eyledim dedikde, ol dahi vekâlet-i mezbûreyi kabûl ve merâsimini edâya ta‘ahhüd etmeğin, mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cumâdelâhire sene 1102. Şuhûdü’l-hâl: Şeyh Mustafa Efendi b. Şaban, Müezzin Mustafa Çelebi b. Mehmed, Derviş Efendi, Mesud? Efendi el-imâm, Ahmed Çelebi b. ( ).