Bab Mahkemesi 54 Numaralı Sicil (H. 1102 / M. 1691) cilt: 20, sayfa: 354 Hüküm no: 429 Orijinal metin no: [74b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hobyar Vakfı’na ait olup yıkılmış olan dükkân arsasının mukâtaa yoluyla İsrail v. Yasef’e kiralanması Zikr-i âtî dükkânın müste’ciri olan işbu bâ‘isü’r-rakīm İsrail v. Yasef meclis-i şer‘-i şerîf-i enverde takrîr-i kelâm ve ta‘bîr ani’l-merâm edip, mahmiye-i İstanbul’da vâki‘ merhûm Hobyar Vakfı müsakkafâtından olup, mahrûse-i Galata’da Câmi‘-i kebîr mahallesinde vâki‘ bir tarafdan yine vakf-ı mezbûrdan olup, el-Hâc Mehmed zevcesi ve Semenoğlu veresesi mutasarrıf oldukları tabib dükkânları ve bir tarafdan Rüstem Paşa Vakfı’ndan benim tasarrufumda olan menzil ve iki tarafdan tarîk-i âm ile mahdûd yevmî dört akçe icâreli bâb kömür mahzeninin ebniyesi bundan akdem vâki‘ olan zelzele[de] bi’l-külliye münhedim olup, arsa-i sırfa kalmakla, müceddeden binâya taraf-ı vakıfda müsâ‘id olmamağın, mütevellî-i vakf-ı mezbûr vakfa enfa‘ olmak üzre mukāta‘a ile îcâr eyleyip yedime temessük vermişidi. Zabt olunup taraf-ı şer‘den dahi istihkâmen yedime hüccet verilmek matlûbumdur dedikde, yedinde olan temessüke nazar olundukda, merkūm İsrail mârru’z-zikr kömür mahzeninin mutasarrıfı olmağla vakfa bırakıp tâlib-i âhar dahi olmamağın, arsa-i mezbûreye mukāta‘aya bağlayıp âhara verilmek her vechile cânib-i vakfa enfa‘ olmağla, keşif hücceti nâtıka olduğu üzre ebniye-i mahdûmesinin zı‘f-ı kıymeti olan beş bin akçe ile şer‘an vakıf için verdiği on üç bin akçe ki, min haysü’l-mecmû‘ on sekiz bin akçeyi merkūm İsrail taraf-ı vakfa verip ve senevî bin sekiz yüz akçe mukāta‘a bağlanmak üzre icâresine bir akçe dahi zam edip üzerine müceddeden ihdâs eylediği binâsı kendi mülkü olmak üzre mezbûr Tabîb İsrail taraf-ı vakıfdan izne tâlib olmağın, ben dahi tevliyetim hasebiyle senevî bin sekiz yüz akçe mukāta‘a bağlayıp ve ebniye-i mahdûmesinin zı‘f-ı kıymeti olan meblağ-ı mezbûr beş bin akçe ile teberru‘an vakf için verdiği on üç bin akçeyi vakıf için ahz u kabz edip ve müceddeden kendi mâlı ile ihdâs ettiği ebniye ve kendi mülkü olmak üzre mezbûre izin verildiğini nâtık ve işbu bin yüz iki senesi Cumâdelâhire gurresiyle müverrah ve mümzâ ve hatmini hâvî ve beynimizde li ecli’l-istihkâm kıbel-i şer‘den dahi işbu vesîka-i enîka ketb ve terkīm olunup, merkūm İsrail yedine def‘ u i‘tâ olundu. Fi’l-yevmi’l-hâdî ve’l-ışrîn min Cumâdelâhire li sene 1102. Şuhûdü’l-hâl: Mehmed Efendi b. Mehmed, Mehmed Çelebi b. ( ), Ali Çelebi b. ( ), Derviş Beşe b. ( ), el-Hâc Mustafa Beşe, Yahya Efendi b. ( ).