Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 230 Hüküm no: 179 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katledilen Ahmed’in varislerinin katil olduğu itham edilen Mehmed Ağa ile sulh olmaları Medîne-i Galata muzâfâtından Kasaba-i Tophane’de el-Hâc Memi mahâllesinde sâkin iken bundan akdem vilâyet-i Anadolu’da Kütahya kazâsına tâbi‘ Çukur nâm karyede yaya beylerinden Balmışzâde? Mehmed Ağa b. İbrahim’in menzilinde katîlen fevt olan Ahmed b. Hamid’in verâseti zevce-i menkûhası Âişe Hatun bt. Mehmed ile vâlidesi Fâtıma bt. Ali’ye ve babası mezbûr Mehmed’e münhasıra olduğu şer‘an zâhir oldukdan sonra nefsinden asil ve zevce-i mezbûre Âişe’nin husûs-ı âti’l-beyanı taleb ve da‘vâ ve lede’l-iktizâ sulh ve ibrâya vekîl olduğu müsecceli olan müteveffâ-yı mezbûrun babası mezbûr Mehmed ile vâlidesi merkūme Fâtıma mahmiye-i İstanbul’da meclis-i şer‘de işbu bâ‘isü’l-kitâb merkūm Mehmed Ağa mahzarında her biri bi’l-asâle ve bi’l-vekâle ikrâr ve takrîr-i kelâm edip oğlu müteveffâ-yı mezbûr Ahmed hayâtında işbu mezbûr Mehmed Ağa’nın hizmetinde olmağla târîh-i kitâbdan on gün mukaddem mezbûr Ahmed karye-i merkūmede vâki‘ menzilinden kable ışâda tunçlu? tüfenk ile göbeği üzerinde amden darb ve katletmekle hâlik-i mezbûrun mûcebini mezbûr Mehmed Ağa’dan taleb ve da‘vâ eylediğimde ol dahi müteveffâ-yı mezbûr Ahmed kabîl-i işâda tabancalı tüfengi beline sokarken tabancası alt tetiğini boşanıp kurşunu göbeğinden vurup mecrûh edip hattâ yedimde olan keşif hücceti nâtık olduğu üzere mezbûr Ahmed’in hayâtında ber-vech-i muharrer kendi tüfengi ile kendini vurup mecrûh edip kimesne ile cerh-i mezbûra müte‘allıka da‘vâsı olmadığını huzûr-ı Müslimînde ikrâr u i‘tirâf etdiğinden sonra fevt olmuşdu deyü mazmûnu takrîrine mutâbık bir kıt‘a hüccet ibrâz etmeğin beynimizde nizâ‘-ı kesîre vâki‘ olmuş idi. El-hâletü hâzihi beynimize muslihûn tavassut edip da‘vâ-i mezkûremizden bizi mezbûr Mehmed Ağa ile yüz yirmi guruş üzerine sulh eylediklerinde biz dahi sulh-ı mezbûru kabûl ve bedel-i sulh olan meblağ-ı merkūm yüz yirmi guruşu yedinden her birimiz tamâmen ahz u kabz edip oğlumuz müteveffâ-yı mezbûr Ahmed’in katline ve dem ü diyetine müte‘allıka âmme-i da‘vâ ve kâffe-i mutâlebâtdan her birimiz mezbûr Mehmed Ağa’nın diyetini bi’l-asâle ve bi’l-vekâle ibrâ ve iskāt eyledik. Min-ba‘d oğlumuz müteveffâ-yı mezbûrun katline ve dem ü diyetine müte‘allıka mezbûr Mehmed Ağa ile ve etbâ‘ından bir ferd ile vechen mine’l-vücûh ve sebeben mine’l-esbâb aslâ da‘vâ ve nizâ‘ımız yokdur dediklerinde [50b] gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî-gurreti Rebî‘u’l-evvel li-sene sitte aşere ve mi’e ve elf. Şuhûdü’l-hâl: Şaban Efendi b. Abdurrahman, Mustafa Efendi b. ( ) Ali Efendi b. Abdullah, Ahmed Ağa b. Mustafa el-mübâşir, Osman Ağa b. Mustafa kuyumcu, vâcibü’t-tekrîm Mehmed Ağa yeniçeriyân-ı Dergâh-ı âlî, Bazergân Mustafa Ağa, fahrü’l-küttâb Ali Efendi yazıcıbaşı, fahrü’l-akrân Ali kethüdâ-i. b[ölük-i] 19, Mustafa Ağa mehterbaşı, Ali Ağa baştüfekçi, el-Hâc Mustafa üçüncü tüfenkçi, Sipâhî Mustafa Efendi 5. B[ölük], …? Mustafa Çelebi kuyumcu.