Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 231 Hüküm no: 180 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusçuk’un Tevekkeloğlu mahallesi halkından bazılarının alacaklarını tahsili Medîne-i Ruscuk’da vâki‘ Ermeniyâna mahsûs mahâllâtdan Tevekkeloğlu mahâllesinden Ohan v. Nordik ve Asvador v. Anderyas ve Bogos v. Bedros ve Toros v. Tatos ve David v. Dakis ve Arot v. Mosis ve Norsiz v. Bedros ve Ağya v. Bogos ve Bedros v. Markos ve Kirkor v. Sahak ve Arot v. Bogos ve Karabet v. David ve Bedros v. Arot ve Mıgırdıç v. Kirkor ve Kasper v. Eğin ve Serkiz v. Abraham ve Vartan v. Bogos ve Arot v. Maradano ve Serkiz v. Bedros ve Bogos v. Bedros ve Minas v. Kirkor ve Mosis v. David ve Haçador v. Ariton ve Agob v. Minas ve Kahman v. İskender ve Avanis v. Revan ve Bedros v. Merkist ve Kızıl v. Kirkor ve Abraham v. Abaza nâm zimmîlerden her biri mahmiye-i İstanbul’da meclis-i şer‘-i hatîrde yine mahâlle-i mezbûre ahâlîsinden Karabet v. Agob ve Bodur? Malkas v. Sagar nâm zimmîler muvâcehelerinde üzerlerine da‘vâ ve takrîr-i kelâm edip mezbûrân Karabet ve Malkas ile işbu hâzır bi’l-meclis Avanos v. Ohan nâm zimmî bin yüz on dört Muharremi gurresinden bin yüz on beş senesi Saferi gurresine gelince mahâlle-i mezbûre ahâlîsinden Kocalarımız ittifâklarıyla üzerimize edâsı lâzım gelen tekâlîf ve sâir masrûfâtımızı mahâlle ahâlîsi beyninde tevzî‘ ve taksîm ve defter eylediğimizde mecmû‘u üç yük otuz iki bin iki yüz doksan iki akçe cem‘ ve tahsîl etdiklerinden sonra bin yüz on beş senesi Seferi’nin onuncu gününde mezbûrûnun huzûr-ı hâkimü’ş-şer‘de muhâsebesini gördüğümüzde makbûzları ber-vech-i muharrer yine üç yük altmış üç bin iki yüz doksan iki akçeye bâliğ olup ve mecmû‘-ı masrûfları dahi üç yük otuz iki bin üç yüz elli dört akçe olmağla masrûfâtlarından ziyâde otuz bin dokuz yüz otuz sekiz akçeyi kendi masrûflarına sarfla istihlâk edip zimmetlerinde bize deynleri olduğunu her biri ikrâr ve bin yüz on beş senesi Saferi’nde medîne-i mezbûre’de nâibü’ş-şer‘ olan Hüseyin Efendi imzâsıyla mümzâ yedimize bir kıt‘a hüccet verdiklerinden sonra meblağ-ı mezbûr otuz bin <> dokuz yüz otuz sekiz akçeden işbu hâzır bi’l-meclis mezbûr Avanos hissesine isâbet eden on bin üç yüz on üç akçeyi mahâlle-i mezbûre ahâlîsi ma‘rifetleriyle mezbûr Avanos yedinden ahz u kabz eylediğimizden sonra hâlâ mezbûrân Karabet ve Malkas’ın üzerlerine edâsı lâzım olan yirmi bin altı yüz yirmi altı akçeden her birimize isâbet eden mikdârın alıverilmesi matlûbumuzdur dediklerinde gıbbe’s-suâl mezbûrân Karabet <> ve Malkas’dan her biri cevâblarında kazıyye müdde‘iyûn-ı mezbûrûnun bâlâda tafsîl etdikleri vech üzere olup mezbûr Avanos’dan kabzlarını i‘tirâf eyledikleri meblağ-ı mezbûr on bin altı yüz yirmi altı akçe deynleri olduğunu ikrâr lâkin mahâlle-i mezbûre ahâlîsinin cümlesi taraflarından Ese v. Arak nâm Ermeni vekâlet-i mutlakā ile vekîlleri olmağla vekâleten ahâlî-i mahâlle mezbûre taraflarından üzerimize edâsı lâzım gelen meblağ-ı mezbûr yirmi bin altı yüz yirmi altı akçe mutâlebesinden zimmetimizi ibrâ ve iskāt edip medîne-i mezbûrede nâibü’ş-şer‘ olan <> Abdullah Efendi imzâsıyla mümzât ve hatemi ile mahtûme yedimize bir kıt‘a ibrâ hücceti vermekle üzerimize edâsı lâzım gelen meblağ-ı mezbûr ile zimmetimiz berî olmuşdur deyü bir kıt‘a hüccet ibrâz ve def‘le mukābele etmeleriyle yedlerinde olan hüccete nazar olundukda mazmûnu meşrû‘ olmayıp ve def‘le mezbûrları dahi mu‘teber olmamağla yedlerinde hüccetleri şak olunup ikrârları üzerlerine edâsı lâzım gelen meblağ-ı mezbûr yirmi bin altı yüz yirmi altı akçeyi müdde‘iyûn-ı mezbûrûn ile mahâlle-i mezbûre ahâlîsinin sâirine edâ etmek üzere mezbûrân Karabet ve Malkas’dan her birine tenbîh birle mâ-vaka‘a bi’t-taleb ketb olundu. Fi’l-yevmi’l-hâmis min-Rebî‘i’l-evvel li-sene sitte aşere ve mi’e ve elf. Şuhûdü’l-hâl: İsmail Efendi el-kādı, Ömer Efendi el-kādı, Mehmed Emin Efendi el-kādı, Mustafa Efendi el-kādı, el-Hâc Yusuf, Sah. Sah. sah.