Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 233 Hüküm no: 181 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağya’nın İbrahim’den almış olduğu borç karşılığında verdiği eşyalardan kaybolanların kıymeti düşüldükten sonra kalan borcunu ödeyerek eşyaları teslim alması Mahmiye-i İstanbul’da Balat kapısı dâhilinde Parmakkapı kurbünde sâkin Ağya v. Abraham nâm Ermeni mahmiye-i mezbûrede meclis-i şer‘de sâhibetü’l-hayrât Şerîfe nâm hatunun nukūd-ı mevkūfesine bi’l-fi‘il mütevellî olan el-Hâc İbrahim yedinden mâl-ı vakf-ı mezbûrdan olmak üzere otuz bir buçuk guruş istidâne ve kabz eylediğimden sonra eşyâmdan bir keremsûd kaftan ve bir hatâyî kaftan ve bir al çekme ve bir işleme şalvar ve bir münakkaş gömlek ve bir işleme bohça ve ikisi otuz guruş kıymetli bir inci enselik ve üçer paftalı bâdem bir inci kuşağımı meblağ-ı mezbûr mukābelesinde mütevellî-i mezbûr yedine irhân vaz‘ ve teslîm ol dahi irtihân ve tesellüm ve kabz etmekle hâlâ meblağ-ı mezbûr otuz bir buçuk guruşu mütevellî-i mezbûra def‘ ü teslîm murâd eylediğimde rihân-ı mezkûreyi bana teslîmden imtinâ‘ eder, suâl olunsun dedikde, gıbbe’s-suâl mütevellî-i mezbûr cevâbında fi’l-hakīka bundan [akdem] mezbûr Ağya’ya mâl-ı vakf-ı mezbûrdan otuz bir buçuk guruş verip ve meblağ-ı mezbûr mukābelesinde rihân-ı mezkûreyi yedinden ahz u kabzını ikrâr lâkin rihân-ı mezkûre sâkin olduğum menzilin mekân mahzeninden sâir rihân ile ma‘an hıfz üzere iken târîh-i kitâbdan elli gün mukaddem menzilime sârık girip sâir rihân ve eşyâm ile ma‘an ancak müdde‘î-i mezbûrun gayrı rihânından mâ‘adâ on beş guruş kıymetli mârrü’z-zikr inci enselik ile üçer paftalı bir inci kuşağını benim hıfzımda ta‘addî ve kusûrum yok iken sirka olunmak ile zâyi‘ olmuşdur, mâ‘adâ rinânı yedimdedir deyüp bu husûsda mütevellî-i merkūm emîn olup yemîni ile tasdîk olunur makūlesinden olmağla gıbbe’t-tahlîfi’ş-şer‘î müdde‘î-i mezbûrdan zikr olunan inci enselik ile inci kuşağın kıymeti otuz guruş olduğuna beyyine taleb olundukda ityân-ı beyyineden izhâr-ı az edip istihlâf etmeğin fi’l-hakīka müdde‘î-i mezbûrun meblağ-ı mezbûr mukābelesinde sâir rihânı ile vaz‘ eylediği zikr olunan enselik ve inci kuşağın on beş guruşdan ziyâde kıymeti olmadığına mütevellî-i mezbûr el-Hâc İbrahim’e yemîn teklîf olundukda ol dahi alâ-vefkı’l-mesûl yemîn billâhi’l-aliyyi’l-a‘lâ etmeğin mûcebiyle deyn-i mezkûrdan zikr olunan enselik ve inci kuşağın kıymeti on beş guruşu meskūtuna ba‘de’l-hükm mezbûr Ağya bâkī kalan on altı buçuk guruş deynini mütevellî-i mezbûra def‘ ü teslîmden sonra sâir rihân-ı mezbûreyi mezbûr Ağya’ya teslîme dahi mütevellî-i mezbûra tenbîh birle mâ-vaka‘a bi’t-taleb ketb olundu. Fî 6 min-şehri Rebî‘ülevvel sene 1116. Şuhûdü’l-hâl: Hüseyin Efendi kâtib-i sır, İsmail Efendi kâtib, Mehmed Efendi kādı, el-Hâc Yusuf b. Osman.