Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 234 Hüküm no: 182 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Saliha’nın varislerinin kendilerine intikal eden menzili Mustafa b. Mehmed’e satmaları Mahmiye-i İstanbul’da Müftî Hamamı kurbünde Murad Efendi mahâllesinde sâkine iken bundan akdem vefât eden Saliha bt. Mehmed nâm hatunun verâseti sadrî kebîr oğlu İsmail ve sadriye kebîre kızı Âişe ve Hadîce’ye münhasıra olup kable’l-kısme mezbûre Âişe dahi vefât edip verâseti zevci Mehmed Beşe b. Mustafa nâm kimesne ile li-ebeveyn er karındaşı mezbûr İsmail ve kız karındaşı mezbûre Hadîce’ye münhasıra ve tashîh-i meseleleri bi-hükmi’l-münâsaha yirmi dört sehmden i‘tibâr olunup sihâm-ı mezbûreden on dört sehmi mezbûr İsmail’e ve yedi sehmi mezbûre Hadîce’ye ve üç sehmi mezbûr Mehmed Beşe’ye isâbet ve intikāl eylediği şer‘an zâhir oldukdan sonra mezbûr İsmail ve Hadîce ve Mehmed Beşe mahmiye-i mezbûrede meclis-i şer‘de bâ‘isü’l-kitâb el-Hâc Mustafa b. el-Hâc Mehmed nâm kimesne mahzarında her biri ikrâr ve takrîr-i kelâm edip mûrisemiz müteveffât-ı evvel-i mezbûre Saliha’nın ile’l-vefât mülkü olup ba‘de-vefâtihâ tashîh-i mezbûr üzere irs-i şer‘le bize isâbet ve intikāl edip mahâlle-i mezbûrede vâki‘ bir tarafdan Medîne-i münevvere vakfı olan menzil ve bir tarafdan mahâlle-i mezbûre imamına meşrûta olan menzil ve bir tarafdan İzzetî Efendi vakfı olan bostan ve bir tarafdan ba‘zan Ekmekçi el-Hâc Mustafa ve ba‘zan İbrahim Efendi menzilleri ve tarîk-i âm ile mahdûd olup tabaka-i ulyâda dört bâb harâbe oda ve vüstâda bir kebîr sofa ve süflâda bir ahır ve bi’r-i mâ ve havluyu müştemil menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile iki yüz elli guruşa mezbûr el-Hâc Mustafa’ya bey‘ ve teslîm, ol dahi iştirâ ve tesellüm ve kabûl edip semeni olan meblağ-ı mezbûr iki yüz elli guruşu mezbûr el-Hâc Mustafa yedinden tamâmen ahz u kabz edip beynimizde bi-kadri’l-hısas tevzî‘ ve taksîm eyledik fîmâ-ba‘d menzil-i mahdûd-ı mezbûr merkūm el-Hâc Mustafa’nın mülk-i müşterâsı olmuşdur. Bizim kat‘â alâka ve medhalimiz kalmadı dediklerinde keyfe mâ yeşâ ve yahtâr mutasarrıf olsun dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-şehri Rebî‘i’l-evvel li-sene sitte aşere ve mi’e ba‘de’l-elf. Şuhûdü’l-hâl: Sinan Efendi b. Ali el-müezzin, Hasan Beşe b. Mehmed, İbrahim Beşe b. Kadri, el-Hâc Mehmed b. Ahmed, el-Hâc Ali b. Mehmed, Abdullah b. Mustafa, Abdullah Efendi b. Mustafa, el-Hâc Yusuf b. Osman, Mustafa b. İbrahim, Mustafa Çelebi b. Şaban.