Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 235 Hüküm no: 183 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâmile Hatun’un menzil ve müştemilatını Çukadar Ali’ye satması Mahmiye-i İstanbul’da Mimarsinan mahâllesinde sâkine olup zâtı ma‘rifet-i şer‘iyye ile ârifân olan İmam Hüseyin Efendi b. el-Hâc Mahmud ve Müezzin Ömer Halîfe b. ( ) nâm kimesneler ta‘rîfleriyle mu‘arrefe olan Kâmile bt. Abdullah nâm hatun mahmiye-i mezbûrede meclis-i şer‘de işbu bâ‘isü’l-kitâb Çukadâr el-Hâc Ali b. Abdülvahhab nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahâlle-i mezbûrede vâki‘ bir tarafdan el-Hâc Sinanzâde Ahmed Efendi menzili ve bir tarafdan Çavuşzâde Ali Ağa menzili ve bir tarafdan Molla Ahi Câmi‘-i şerîfi ve bir tarafdan tarîk-i âm ile mahdûd dâhiliyesi fevkānî iki bâb oda ve tahtânî bir bâb oda ve kenîf ve hâriciyesi dahi fevkānî bir bâb oda ve altında ahırı ve bir kenîf ve bir mikdâr havluyu müştemil olan mülk menzilimi cümle tevâbi‘ ve levâhıkı ile tarafeynden bi’l-îcâb ve’l-kabûl bey‘-i kat‘î ile iki yüz guruşa merkūm el-Hâc Ali’ye bey‘ ve teslîm ol dahi ber-vech-i muharrer iştirâ ve tesellüm ve kabûl eylediğinden sonra semeni olan meblağ-ı mezbûr iki yüz guruşun mutâlebesinden mezbûr el-Hâc Ali’nin zimmetini ibrâ-i âmm-ı kātı‘ü’n-nizâ‘ ile ibrâ ve iskāt <> eyledim. Ba‘de’l-yevm menzil-i mahdûd-ı mezkûrda alâka ve medhalim kalmadı, mezbûr el-Hâc Ali’nin mülk-i müşterâsı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Fahrü’l-müderrisîni’l-kirâm Mustafa Efendi, fahrü’l-müderrisîn Alizâde Mustafa Efendi, Kâtib Hüseyin Efendi, Sandalcızâde İsmail Efendi, Veliyüddin Efendi el-kādı, el-Hâc Yusuf muhzır, İslâm Bey muhzır, Mehmed Efendi kâtib.