Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 235 Hüküm no: 184 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayezidli Cemaatinden Mustafa’nın Salih Ağa aleyhindeki alacak davasında anlaşma sağlanması Ekrâd tâifesinden Bâyezidli Cemâ‘ati’nden olup mahmiye-i İstanbul’da müsâferet vechi üzere sâkin olan Mustafa b. Abbas nâm kimesne mahmiye-i mezbûrede meclis-i şer‘-i hatîrde sâbıkā Van vâlisi olan Mustafa Paşa’nın kethüdâsı işbu bâ‘isü’l-kitâb Salih Ağa b. Mehmed nâm kimesne mahzarında ikrâr ve takrîr-i kelâm edip mûmâ-ileyh Mustafa Paşa Van muhâfızı iken mezbûr Salih Ağa kethüdâsı olmağla malımdan her biri bir buçuk guruş kıymetli bin iki yüz re’s koyunum ile yüz elli guruş kıymetli üç re’s atımı mezbûr Salih Ağa bi-gayrı hakkın zulmen ahz ve istihlâk etmekle zikr olunan koyunlar ile atların kıymetleri olan cem‘an bin dokuz yüz elli guruşu merkūm Salih Ağa’dan taleb ve da‘vâ eylediğimde ol dahi bi’l-külliye inkâr edip ben dahi müdde‘âmı isbât sadedinde iken beynimiz ba‘de’n-nizâ‘ muslihûn tavassut edip da‘vâ-i mezbûremden beni mezbûr Salih Ağa ile an-inkâr beş yüz guruş üzerine sulh etdiklerinde her birimiz sulh-ı mezbûru kabûl ve bedel-i sulh olan meblağ-ı mezbûr beş yüz guruşu merkūm Salih Ağa yedinden tamâmen ahz u kabz eyledim. Ba‘de’l-yevm mezbûr Salih Ağa ile da‘vâ ve nizâ‘ım kalmayıp husûs-ı mezbûra müte‘allık da‘vâdan zimmetini ibrâ ve iskāt eyledim. Ba‘de’l-yevm benden ya vekîlimden husûs-ı mezbûra müte‘allıka da‘vâ sudûr ederse lede’l-hükkâmi’l-kirâm makbûle ve mesmû‘a olmasın dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Ali Ağa b. Mehmed, Halil Ağa b. Mehmed, Süleyman Ağa b. İsmail, Mîr Şeyh? b. Abbas, Hüseyin Efendi kâtib, el-Hâc Yusuf b. ( ).