Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 236 Hüküm no: 185 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi’nin İstefe kazasında çiftlik olarak bilinen arsası ile ona bağlı tarlalarını Ayşe Hatun’a satması Fi’l-asl vilâyet-i Rumeli’nde İstefe kazâsı ahâlîsinden olup hâlâ mahrûse-i Galata muzâfâtından kasaba-i Kasımpaşa’da Tahta Kādı mahâllesinde sâkin Hüseyin Çelebi b. Abdullah nâm kimesne mahmiye-i İstanbul’da meclis-i şer‘de işbu sâhibetü’l-kitâb fahrü’l-muhadderât Âişe Hanım bt. Ahmed Paşa tarafından husûs-ı âti’l-beyanı tasdîka vekîl olduğu zât-ı müşârün-ileyhâyı ma‘rifet-i şer‘iyye ile ârifân olan Ali Çelebi b. Süleyman ve es-Seyyid Yusuf b. es-Seyyid Sunullah nâm kimesneler şehâdetleriyle vekâleti sâbite olan Hüseyin Efendi b. Ahmed nâm kimesne mahzarında bi-tav‘ihî ikrâr ve takrîr-i kelâm edip akd-i âtî sudûruna değin yedimde mülk ve hakkım olup mârrü’z-zikr İstefe kazâsında Kazmış demekle ma‘rûf mevzi‘de vâki‘ etrâf-ı erba‘ası müvekkile-i mûmaileyhânın mülkü ile mahdûd ve mümtâz Yahyaoğlu Yurdu demekle meşhûr çiftlik ta‘bîr olunur mülk arsamı cümle tevâbi‘ ve levâhıkı ile tarafeynden bi’l-îcâb ve’l-kabûl bey‘-i kat‘î ile müvekkile-i müşârün-ileyhâya yirmi guruşa bey‘ ve temlîk, ol dahi iştirâ ve temellük edip ve çiftlik-i mahdûda teba‘iyetle zirâ‘at olunur taht-ı tasarrufunda olan ma‘lûmü’l-hudûd ve’l-kıt‘a ve dönümü beynimizde ma‘lûm tarlaların hakk-ı tasarrufunu dahi ma‘rifet-i sâhib-i arz ile altmış guruş bedel mukābelesinde müvekkile-i mûmâ-ileyhâya ferâğ ve tefvîz ol dahi tefevvüz ve kabûl eylediğinden sonra semen-i mezkûr yirmi guruş ile bedel-i merkūm altmış guruş ki cem‘an seksen guruşu yedinden tamâmen ahz u kabz eyledim. Ba‘de’l-yevm çiftlik-i mezkûr müvekile-i mûmâ-ileyhânın mülk-i müşterâsı ve tarlalar dahi hakk-ı müfevvezi olmuşdur. keyfe mâ teşâ ve tahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Fahrü’l-ümerâ Hasan Paşa b. Mustafa, el-Hâc İbrahim Bey b. Hasan Paşa, el-Hâc Mehmed b. Abdullah, Ahmed Ağa yazıcı, Ahmed Çelebi b. Hasan, Bayram Çelebi b. Abdullah, el-Hâc Yusuf b. Abdullah.