Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 239 Hüküm no: 189 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın Mahmud Beşe ile olan miras davasında anlaşma sağlanması Mahmiye-i İstanbul’da Âşıkpaşa mahâllesi sâkinelerinden bundan akdem müteveffiye olan Emine bt. Abdullah nâm hatunun verâseti zevc-i metrûku Mahmud Beşe b. Abdullah ve li-ebin utâka cihetinden vârisi olan İbrahim Ağa b. Hasan nâm kimesneye münhasıra olduğu zâhir ve müte‘ayyin oldukdan sonra mezbûr ibrâhim Ağa tarafından husûs-ı âti’l-beyana vekîl olduğu Ahmed Çelebi b. Hüseyin ve Mahmud b. Halil nâm kimesneler şehâdetleriyle şer‘an sâbit olan Hüseyin Efendi b. Ali nâm kimesne mahmiye-i mezbûrede meclis-i şer‘de müteveffiye-i mezbûrenin terekesine bi’l-verâse vâzı‘ü’l-yed olan mezbûr Mahmud Beşe mahzarında bi’l-vekâle ikrâr ve takrîr-i kelâm edip müteveffât-ı mezbûrenin terekesinden kırk guruşluk eşyâsını ahz ketm eyledin deyü müvekkilim mezbûr İbrahim Ağa meblağ-ı merkūmdan hisse-i ırsiyesini bundan akdem merkūm Mahmud Beşe’den taleb ve da‘vâ eylediğinde beynlerinde nizâ‘-ı küllî vukū‘undan sonra el-hâletü hâzihi tavassut-ı muslihîn ile da‘vâ-i mezkûresinden merkūm Mahmud Beşe ile on guruş üzerine inşâ-yı akd-i sulh eylediklerinde ol dahi sulh-ı mezbûru ba‘de’l-kabûl bedel-i sulh olan meblağ-ı merkūmu mezbûr İbrahim Ağa’ya def‘ ü teslîm ol dahi alıp kabz edip müteveffât-ı mezbûrenin mîrâsa müte‘allıka da‘vâdan zevci mezbûr Mahmud Beşe’nin zimmetini ibrâ ve iskāt eyledi dedikde, gıbbe’t-tasdîk mâ-vaka‘a bi’t-taleb ketb olundu. Fi’l-yevmi’s-sânî aşer min-şehri Rebî‘i’l-evvel sene sitte aşere ve mi’e ve elf Şuhûdü’l-hâl: Mehmed Efendi b. Hasan, Mehmed Efendi b. Ali, Mustafa Beşe b. İbrahim, Halil b. Mehmed, Süleyman b. Mustafa.