Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 240 Hüküm no: 190 Orijinal metin no: [53a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin Ramazan Beşe aleyhindeki alacak davasının reddedilmesi Vilâyet-i Anadolu’da Bolu ahâlîsinden olup Anadolu kuzâtından olmak ile mahmiye-i İstanbul’da mülâzemet vechi üzere sâkin Mustafa Efendi b. Mehmed nâm kimesne mahmiye-i mezbûrede meclis-i şer‘de işbu bâ‘isü’l-vesîka Ramazan Beşe b. İbrahim nâm kimesne mahzarında üzerine da‘vâ ve takrîr-i kelâm edip târîh-i kitâbdan bir sene mukaddem mezbûr Ramazan Beşe Edirne’de ma‘reke esnâsında benim için sen bundan akdem Bolu sâkinlerinden olup fevt olan Ali Efendi nâm kimesne zimmetinde cihet-i deyn-i şer‘îden hakkım olan altmış beş guruşuma kefil oldun deyü cebren bi-gayrı hakkın yirmi guruşumu [53b] ahz etmekle hâlâ mezbûr Ramazan Beşe’ye suâl olunup bi-gayrı hakkın ahz eylediği meblağ-ı mezbûrun alıverilmesi matlûbumdur dedikde gıbbe’s-suâl mezbûr Ramazan Beşe cevâbında fi’l-hakīka müteveffâ-yı mezbûr Ali Efendi zimmetinde cihet-i deyn-i şer‘îden hakkım olan altmış beş guruşuma bundan akdem mezbûr Mustafa kefil olmağla meblağ-ı mezbûru asil-i mezbûr Ali Efendi’den kable’l-ahz ve’l-istîfâ fevt olmağın ben dahi meblağ-ı mezbûr altmış beş guruşu târîh-i mezbûrda merkūm Mustafa Efendi’den kefâlet-i mahkiyesine binâen taleb ve da‘vâ sadedinde olduğumda beynimizde muslihûn tavassut edip meblağ-ı mezbûr da‘vâsından beni mezbûr Mustafa Efendi ile meblağ-ı merkūm yirmi guruş üzerine sulh eylediklerinde ben dahi sulh-ı mezbûru ba‘de’l-kabûl husûs-ı mezbûra müte‘allıka âmme-i da‘vâdan ben mezbûr Mustafa Efendi’nin zimmetini ibrâ ve iskāt edip ol dahi bedel-i sulh deyü bana medfû‘u olan meblağ-ı mezbûra müte‘allıka da‘vâdan benim zimmetimi ibrâ ve iskāt etmekle ol vechile meblağ-ı mezbûru ahz u kabz etmişdim deyü def‘le mukābele edicek gıbbe’l-istintâk ve’l-inkâr merkūm Ramazan Beşe’den def‘-i mezkûruna beyyine taleb olundukda udûl-i ahrâr-ı ricâl-i Müslimînden ve Canbaz tâifesinden Mehmed Beşe b. Abdullah ve Mahmud b. Muslı nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ târîh-i kitâbdan bir sene mukaddem mezbûr Ramazan Beşe cihet-i deynden müteveffâ-yı mezbûr Ali Efendi zimmetinde hakkı olan altmış beş guruşuna kefil olan mezbûr Mustafa Efendi’den kefâletine binâen meblağ-ı mezbûru merkūm Ramazan Beşe taleb ve da‘vâ sadedinde olduğunda beynlerine muslihûn tavassut edip meblağ-ı mezbûr da‘vâsından mezbûr Ramazan Beşe’yi mezbûr Mustafa Efendi ile meblağ-ı mezbûr yirmi guruş üzerine sulh eylediklerinde ol dahi sulh-ı mezbûru kabûl ve bedel-i sulh olan meblağ-ı mezbûru yedinden ba‘de’l-ahz husûs-ı mezkûra müte‘allıka âmme-i da‘vâdan mezbûr Ramazan Beşe’nin zimmetini ibrâ ve iskāt etmiş idi. Biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûr, merkūm Ramazan Beşe’ye bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sânî aşer min-şehri Rebî‘i’l-evvel li-sene sitte aşere ve mi’e ba‘de’l-elf. Şuhûdü’l-hâl: Hüseyin Efendi b. Himmet, İsmail Efendi el-kâtib, Mustafa Efendi kâtib, el-Hâc Osman çukadâr, el-Hâc Ali çukadâr.