Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 241 Hüküm no: 191 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin Kasab İvaz Mahallesi Avarız Vakfı’ndan aldığı borç karşılığında evini rehin vermesi (istiğlal) Mahmiye-i İstanbul’da el-Hâc Demir mahâllesi sükkânından el-Hâc Mehmed Çelebi b. Hasan nâm kimesne mahmiye-i mezbûrede meclis-i şer‘de merhûme Saime Hatun nâm sâhibetü’l-hayrın Kasab İvaz mahâllesi avârızına vakfeylediği nukūd-ı mevkūfenin bi’l-fi‘il mütevellîsi olan işbu bâ‘isü’l-kitâb İsmail Efendi b. Derviş tarafından âti’l-beyanı tasdîka vekîl olduğu nehc-i şer‘î ve tarîk-i mer‘î üzere sâbit olan Mehmed Efendi b. el-Hâc Mustafa nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup zikr olunan Hacı Demir mahâllesinde vâki‘ bir tarafdan Kasab Mustafa Çelebi mülkü ve bir tarafdan Havva Hatun mülkü ve bir tarafdan Kuyumcu zimmî menzili ve bir tarafdan tarîk-i âm ile mahdûd iki bâb fevkānî oda ve bir bâb tahtânî oda ve kapı aralığı arsası ve cüneyne ve kenîfi müştemil mülk menzilimi cemî‘ tevâbi‘ ve levâhıkı ile mütevellî-i mezbûr İsmail Efendi’ye bi-tarîkı’l-istiğlâl seksen guruşa bey‘ ve teslîm, ol dahi ber-vech-i muharrer iştirâ ve tesellüm ve kabûl eylediğinden sonra semeni olan meblağ-ı mezbûr seksen guruşu mütevellî-i mezbûr İsmail Efendi yedinde olan mâl-ı vakf-ı mezbûrdan tamâmen bana def‘ ü teslîm, ben dahi yedinden ahz u kabz eylediğimden sonra yine menzil-i mahdûd-ı mezkûru mezbûr İsmail Efendi ba‘de’t-tahliyeti’ş-şer‘iyye târîh-i kitâbdan üç yüz altmış gün tamâmına değin on iki guruşa bana icâr ve teslîm ben dahi isticâr ve tesellüm ve kabûl eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-şehri Rebî‘i’l-evvel li-sene sitte aşere ve mi’e ba‘de’l-elf. Şuhûdü’l-hâl: Hüseyin Efendi el-kâtib, el-Hâc Mehmed Efendi el-kādı, İsmail Efendi el-kâtib, Veliyüddin Efendi el-kâtib, Emin Mehmed Efendi el-kâtib.