Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 242 Hüküm no: 192 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hanım’ın Abdullah Yazıcı aleyhindeki bağ satışı davasının reddedilmesi Medîne-i Üsküdar kazâsı muzâfâtından Karamürsel kasabasında sâkine Rabia bt. İbrahim tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iyye ile ârifân olan Mehmed b. Ali ve Mustafa b. Abdülbaki nâm kimesneler şehâdetleri ile şer‘an sâbite olan Âişe bt. Süleyman nâm hatun mahmiye-i İstanbul’da meclis-i şer‘-i hatîrde zikri âtî bağlara vâzı‘ü’l-yed olan bâ‘isetü’l-kitâb Abdullah Yazıcı b. İbrahim nâm kimesne mahzarında bi’l-vekâle üzerine da‘vâ ve takrîr-i kelâm edip müvekkilem mezbûre Rabia Hatun târîh-i kitâbdan on sekiz sene mukaddem yedinde mülkü olup kasaba-i mezbûre civârında Küçükçınar nâm mevzi‘de vâki‘ bir tarafı yine müvekkilem mezbûre Rabia bağı ve bir tarafdan Hasan Beşe nâm kimesne bağı ve iki tarafdan tarîk-i âm ile mahdûd bir kıt‘a ve yine mahâlle-i mezbûrede vâki‘ bir tarafdan müvekkile-i mezbûre bağı ve bir tarafdan Abdurrahman nâm kimesne bağı ve bir tarafdan Mangırcıoğlu bağı ve bir tarafdan tarîk-i âm ile mahdûd bir kıt‘a ki zikr olunan iki kıt‘a [54a] mülk bağlarını târîh-i mezbûrda semen-i misilleri olan yüz elli guruşdan mütecâviz iken müvekkilem mezbûre Rabia Hatun mezbûr Abdullah Yazıcı’ya safka-i vâhide ile semen-i misillerinden noksân-ı fâhiş ile doksan guruş semen-i makbûza bâtten bey‘ ve teslîm, ol dahi iştirâ ve tesellüm ve kabûl edip zikr olunan bağları mezbûr Abdullah Yazıcı sinîn-i mezkûrdan beri zabt ve tasarruf ve hâsıl olan mahsûlâtını ahz u kabz edip husûs-ı mezbûrda gabn-i fâhiş olmağla hâlâ mezbûr Abdullah Yazıcı’ya suâl olunsun dedikde, müdde‘iye-i mezbûrenin takrîr-i meşrûhu üzere mârrü’z-zikr bağları merkūm Abdullah Yazıcı mülk-i müşterâsı olmak üzere on sene zabt ve tasarruf edip bilâ-nizâ‘ on sekiz sene terk olunan da‘vânın bilâ-emr isti‘mâı câiz olmamağla mezbûr Abdullah Yazıcı’ya suâl dahi teveccüh etmemeğin müdde‘iye-i mezbûre Âişe Hatun bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâlis aşer min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, Ömer Efendi b. Ali, İsmail Efendi el-kâtib, el-Hâc Yusuf b. Osman.