Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 243 Hüküm no: 193 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva ve kardeşi Rabia hatunların tasarruflarında olan menzillerini Mehmed b. Ali’ye satmaları Mahmiye-i İstanbul’da Mimarsinan mahâllesinde sâkine olup zâtı Süleyman b. Abdullah ve Yusuf b. Mustafa nâm kimesneler ta‘rîfleriyle mu‘arrefe olan Havva bt. Mehmed Sipâhî nâm hatun asâleten ve li-ebeveyn kız karındaşı Rabia nâm hatun tarafından husûs-ı âti’l-beyana vekîl olduğu zâtını ma‘rifet-i şer‘iyye ile ârifân mezbûrân Süleyman ve Yusuf şehâdetleriyle sâbit olan Hüseyin Ağa b. Abdurrahman nâm kimesne vekâleten mahmiye-i mezbûrede meclis-i şer‘de işbu râfi‘ü’l-vesîka es-Seyyid Mehmed Efendi b. es-Seyyid Ali mahzarında her biri bi’l-asâle ve bi’l-vekâle ikrâr ve takrîr-i kelâm edip mahâlle-i mezbûrede vâki‘ ebniyesi bi’l-iştirâk yedlerinde mülk ve hakları olup arsasının İsmail Ağa Vakfı’na ve bir mikdâr Molla Ahi Vakfı’na senede yüz elli akçe mukāta‘ası olup bir tarafdan Yusuf b. Abdullah menzili ve bir tarafdan Kerime Hatun menzili ve bir tarafdan Kovalızâde tasarrufunda olan Molla Ahi Vakfı bahçe ve bir tarafdan tarîk-i âm ile mahdûd fevkānî bir bâb ve tahtânî bir bâb odayı ve sofa ve bir mikdâr havluyu müştemil menzilin ebniyesini tarafeynden bi’l-îcâb ve’l-kabûl bey‘-i kat‘î ile mezbûr Seyyid Mehmed Efendi’ye yüz yirmi guruşa bi’l-asâle ve bi’l-vekâle bey‘ ve teslîm ve arsasını dahi bâ-ma‘rifet-i mütevellî meccânen ferâğ ve tefvîz ol dahi iştirâ ve tesellüm ve tefevvüz ve kabûl eyledikden sonra semen olan meblağ-ı mezbûru yedinden tamâmen ahz u kabz eyledik ba‘de’l-yevm menzil-i mahdûd-ı mezbûrun ebniyesi merkūm es-Seyyid Mehmed’in mülk-i müşterâsıdır ve arsası dahi hakk-ı müfevvezidir, keyfe mâ yeşâ ve yahtâr mutasarrıf olsun dedikde gıbbe’t-tasdîkiş-şer‘î mâ-vaka‘a bi’t-taleb ketb olundu. Fi 10 min-şehri Rebî‘ülevvel sene 1116. Şuhûdü’l-hâl: Mehmed Efendi b. Ahmed, Gümüşîzâde Muallim? Mehmed Efendi, Hüseyin Efendi b. Hasan, Mehmed b. Abdullah b. ( ), el-Hâc Yusuf b. Osman.