Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 243 Hüküm no: 194 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Handon bt. Kokas’ın vefat eden kardeşi Kirakos’un eşi Martar aleyhindeki eşya davasının reddedilmesi Medîne-i Üsküdar muzâfâtından Karamürsel nâhiyesine tâbi‘ Yeniköy’de sâkine Handon bt. Kokas nâm Nasrâniye mahmiye-i İstanbul’da meclis-i şer‘de karındaşı olup karye-i mezbûrede sâkin iken bundan akdem hâlik olan Kiragos v. Kakos’un zevce-i metrûkesi olan bâ‘isetü’s-sifr Ma[r]tar bt. Norsez nâm Nasrâniyye muvâcehesinde üzerine da‘vâ ve takrîr-i kelâm edip mezbûre Martar karındaşım hâlik-i mezbûrun zevcesi olmağla zevcim hâlik-i mezbûrun sende eşyâsı vardır deyü bundan akdem karye-i mezbûrede vâki‘ menzilime gelip malımdan bi-gayrı hakkın üç yüz doksan yedi guruşluk eşyâ-yı ma‘lûmemi ahz u kabz etmişdir, suâl olunsun dedikde, gıbbe’s-suâl ve akībe’l-inkâr müdde‘iye-i mezbûreden müdde‘âsını mübeyyine beyyine taleb olundukda ityân-ı beyyine için istimhâl etmeğin kirâren mirâren mehl-i şer‘î ile imhâl olunup bir vechile ityân-ı beyyineye kādir olmayıp izhâr-ı aczile istihlâf etmeğin fi’l-hakīka müdde‘î-i mezbûrenin malından bâlâda zikr olunduğu üzere bi-gayrı hakkın üç yüz doksan yedi guruşluk eşyâsını ahz u kabz etmeyip üzerine redd ü damândan bir nesne lâzım gelmediğine mezbûre Martar’a yemîn teklîf olundukda ol dahi yemîn billâhillezî enzele’l-İncîle alâ-İsâ -aleyhi’s-selâm- etmeğin mûcebince müdde‘iye-i mezbûre Handon bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’r-râbi aşer min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, İsmail Efendi el-kâtib, Ömer Efendi b. Ali, el-Hâc Yusuf b. Osman.