Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 244 Hüküm no: 195 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın menzil ve müştemilatını Fatıma bt. Ahmed’e satması Mahmiye-i Edirne’de Sultân Selim kurbünde Hızır Ağa mahâllesi ahâlîsinden Ahmed Ağa b. Hamza nâm kimesne mahmiye-i İstanbul’da meclis-i şer‘de işbu bâ‘isetü’l-vesîka zevcesi Fâtıma bt. Ahmed nâm hatun tarafından husûs-ı âti’l-beyanı tasdîka vekîli olan el-Hâc Mehmed b. Şaban nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkımdan olup mahâlle-i mezbûrede vâki‘ bir tarafdan Haşimzâde Âişe Hatun mülkü ve bir tarafdan sâbıkā Gümrük emîni olan Hüseyin Ağa veresesi mülkleri ve bir tarafdan ba‘zan Dolabaşızâde ve ba‘zan Suyolcu el-Hâc Mustafa nâm kimesne mülkleri ve ba‘zan mahâlle-i mezbûre imamına meşrûta menzil ve bir tarafdan yine benim âhar mülküm olup hâriciye ta‘bîr olunur sâkin olduğum menzilim ve tarîk-i âm ile mahdûd iki bâb tahtânî oda ve bir matbâh ve bi’r-i mâ ve bahçe ve bir mikdâr arsa-i hâliyeyi müştemil dâhiliye ta‘bîr olunur mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem müvekkile-i mezbûreye yüz elli guruşa bey‘ ve temlîk ol dahi ber-vech-i muharrer iştirâ ve temellük ve kabûl eyleyip semeni olan meblağ-ı mezbûr yüz elli guruşu yedinden ahz u kabz eyledim, ba‘de’l-yevm menzil-i mahdûd-ı mezkûrun dâhiliyesi zevcem müvekkile-i mezbûrenin mülk-i müşterâsıdır keyfe mâ teşâ ve tahtâr mutasarrıfe olsun dedikde ve mahâllinde zabt u tasarrufa mezbûreyi taslît eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: Veli Efendi el-kādı, Emin Mehmed Efendi el-kâtib, Ahmed Çelebi kâtib, el-Hâc Yusuf b. ( )