Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 245 Hüküm no: 196 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin İstanbul’daki Bürüncük bükücü taifesine kethüda tayin olunması Mahmiye-i İstanbul’da vâki‘ bürüncük bükücü tâifesinden Hacı İbrahim b. Ahmed ve Mehmed b. Ahmed ve Hamza b. Halil ve Ahmed b. Mehmed ve Hüseyin b. Ali ve Mustafa b. Derviş ve Ömer Çelebi b. Feyzullah ve Abdülbaki b. Mehmed ve Yiğitbaşı Mustafa Çelebi b. Bayram ve Kethüda-yı sâbık Mehmed b. Bayram ve Ali Çelebi b. ( ) ve Mehmed Odabaşı b. İbrahim ve Mehmed b. İbrahim ve Mustafa b. Süleyman ve Mehmed b. Ahmed ve Ahmed b. Süleyman ve Süleyman b. Ahmed ve Mehmed b. Bestan ve Osman b. Derviş ve Kethüdâzâde Mustafa Çelebi b. Mehmed ve Bağdâdî Ali Beşir b. Veli nâm kimesneler ve sâirleri mahmiye-i mezbûrede meclis-i şer‘-i hatîr-i lâzımü’t-tevkīrde yine tâife-i mezbûreden işbu bâ‘isü’l-kitâb Ahmed Çelebi b. Hüseyin nâm kimesne mahzarında her biri ikrâr ve takrîr-i kelâm edip bizim beynimizde vâki‘ olan ba‘zı hidemât ve sâir umûrumuzu görmeğe üzerimize bir kethüdâ lâzım olmağla mezbûr Ahmed Çelebi cümlemizin muhtârı ve beynimizde vâki‘ olan hidemât ve umûrumuzu görmeğe kādir olmağla cümlemiz rızâmız ile mezbûr Ahmed Çelebi’yi üzerimize umûrumuzu görmek üzere her birimiz kethüdâ nasb ve ihtiyâr eyledik dediklerinde ve mezbûr Ahmed Çelebi dahi zikr olunan kethüdâlığı kabûl ve hidemât-ı lâzımesini kemâ-yenbagī görmeğe ta‘ahhüd ve iltizâm etmeğin mâ-vaka‘a bi’t-taleb ketb olundu, Fi’l-yevmi’l-hâmis aşer min-Rebî‘i’l-evvel sene sitte aşere ve mi’e ve elf. Şuhûdü’l-hâl: İsmail Efendi kâtib, Ömer Efendi kâtib, Veli Efendi kâtib, Emin Mehmed Efendi kâtib, Mustafa Efendi kâtib, el-Hâc Yusuf muhzır.