Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 245 Hüküm no: 197 Orijinal metin no: [54b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Minas ve Bağdasar kardeşlerin Hayreddin Çavuş Mescidi Vakfı’ndan istiğlal yoluyla borç alması Medîne-i Üsküdar’da merhûm Hayreddin Çavuş Mescidi şerîfi’nin nukūd-ı mevkūfesine mütevellî olan el-Hâc İsmail b. Ali nâm kimesne mahmiye-i İstanbul’da meclis-i şer‘de bâ‘iseyi’s-sifr [Minas] ve Bağdasar veledey Sahak nâm zimmîler muvâcehelerinde bi’t-tevliye ikrâr ve takrîr-i kelâm edip bundan akdem merkūmân Minas ve Bağdasar medîne-i mezbûrede Pazarbaşı mahâllesinde vâki‘ ma‘lûmü’l-hudûd ve’l-müştemilât menzilini vakf-ı mezbûra sâbıkā mütevellî olan Şaban Çelebi nâm kimesneye yüz altmış guruşa bi-tarîkı’l-istiğlâl bey‘ ve teslîm ol dahi mâl-ı vakf-ı mezbûr ile iştirâ ve tesellüm edip üç seneye değin meblağ-ı merkūmu cânib-i vakf-ı mezbûra edâdan âciz olurlar ise menzil-i mezkûru semen-i misline bey‘a ve semeninden deyn-i mezbûru taraf-ı vakfa edâya taraflarından Ebubekir b. Ali nâm kimesneyi tevkîl ol dahi ba‘de’l-kabûl ecel-i mezkûr hulûlünde merkūmân Minas ve Bağdasar deyn-i merkūmu edâdan âciz olduklarında vekîl-i merkūm menzil-i mezkûru ba‘de’l-müzâyede Aleksan nâm zimmîye yüz yirmi guruşa bey‘ ve teslîm, ol dahi ber-vech-i muharrer iştirâ ve tesellüm eylediğinden sonra semen-i mezbûru deyn-i mezkûr için vekîl-i merkūm bana def‘ ü teslîm ben dahi ahz u kabz, mâ‘adâsı olan kırk guruşu dahi merkūmân Minas ve Bağdasar zimmetlerinde kalmış idi, el-hâletü hâzihi meblağ-ı bâkī-i mezbûr kırk guruşu dahi merkūmân Bağdasar ve Minas bana def‘ ü teslîm ben dahi tevliyetim hasebiyle yedlerinden tamâmen alıp kabz edip merkūmân Minas ve Bağdasar’ın taraf-ı vakf-ı mezbûra olan yüz altmış guruş deynlerinden zimmetlerinde bir nesne kalmadı dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-işrîn min-Muharremü’l-haram li-sene sitte aşere ve mi’e ve elf. Şuhûdü’l-hâl: Abdullah Efendi b. Yahya, el-Hâc Mustafa b. Mehmed, Molla Ali b. Ebubekir, Hasan Çelebi b. Hüseyin, el-Hâc Ahmed b. Mehmed, Yusuf Bey b. Receb, Mehmed Çelebi b. Hasan.