Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 246 Hüküm no: 198 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Raziye’nin varislerinden menzil hissesini alan Receb Çelebi’nin hisseyi satışı Mahmiye-i İstanbul’da Çerâğī Hamza mahâllesinde sâkin iken bundan akdem fevt olan Osman Efendi b. Ahmed’in verâseti zevce-i metrûkesi fahrü’l-muhadderât Şerîfe Emetullah Hatun bt. el-merhûm es-Seyyid Halil Efendi ile sulbiye kebîre kızları Şerîfe Fâtıma ve Şerîfe Havva’ya ve li-ebeveyn er karındaşı el-Hâc Mustafa’ya ve li-ebeveyn kız karındaşı Hadîce ve Emine’ye ve Razıye’ye münhasıra olup kable’l-kısme mezbûre Razıye dahi vefât edip verâseti sulbî kebîr oğulları Abdurrahman Çelebi ve Mehmed Çelebi’ye münhasıra oldukdan sonra bi-tarîkı’l-münâsahati’ş-şer‘iyye meseleleri kırk sekiz sehmden i‘tibâr olunup sihâm-ı mezbûreden altı sehmi mezbûre Şerîfe Emetullah Hatun’a ve on altışar sehmi mezbûretân Şerîfe Fâtıma ve Şerîfe Havva’dan her birine ve dört sehmi mezbûr el-Hâc Mustafa’ya ve ikişer sehmi mezbûretân Hadîce ve Emine’ye ve birer sehmi mezbûretân Abdurrahman Çelebi ve Mehmed Çelebi’den her birine isâbet ve mezbûr Mehmed Çelebi vâlidesi müteveffât-ı mezbûre Razıye’den kendüye isâbet eden bir sehim hissesini Receb Efendi b. el-Hâc Mustafa’ya bey‘ eylediği şer‘an zâhir oldukdan sonra müteveffât-ı mezbûre Razıye’nin oğlu olup terekesinden ırsen bir sehim hisseye mâlik olan mezbûr Abdurrahman Çelebi ile mezbûr Mehmed’in bir sehim hissesine şirâen mâlik olan merkūm Receb Efendi nâm kimesneler mahmiye-i mezbûrede meclis-i şer‘de işbu bâ‘isetü’l-vesîka mezbûre Şerîfe Emetullah Hatun tarafından husûs-ı âti’l-beyanı tasdîka vekîl olduğu zât-ı mezbûreyi ma‘rifet-i şer‘iyye ile ârifân Süleyman Çelebi b. Mustafa ve Mahmud Çelebi b. el-Hâc Mustafa nâm kimesne şehâdetleriyle sâbit olan Ahmed Efendi b. Yusuf mahzarında her biri ikrâr ve takrîr-i kelâm edip müteveffâ-yı evvel-i mezkûrun terekesinden olup mahâlle-i mezbûrede vâki‘ lede’l-ahâlî ve’l-cîrân ma‘lûmü’l-hudûd menzilden her birimize ırsen ve şirâen mâlik olduğumuz birer sehim hisse-i şâyi‘alarımızı bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile müvekkile-i mezbûre Şerîfe Emetullah Hatun’a her birimiz hissemizi onar guruşdan cem‘an yirmi guruşa bey‘ ve teslîm ve temlîk, ol dahi iştirâ ve temellük ve kabûl eyledikden sonra semenleri olan cem‘an yirmi guruşu her birimiz müvekkile-i mezbûre Şerîfe Emetullah Hatun yedinden tamâmen ahz u kabz eyledik ba‘de’l-yevm menzil-i mahdûd-ı mezbûrda bizim birer sehim hisse-i şâyi‘amızda alâka ve medhalimiz kalmadı, müvekkile-i mezbûre Şerîfe Emetullah Hatun’un mülk-i müşterâsıdır, keyfe mâ yeşâ ve yahtâr mutasarrıf olsun dediklerinde gıbbe’t-tasdîk bi’t-taleb ketb olundu. Fi’l-yevmi’l-hâmis aşer min-şehri Rebî‘i’l-evvel sene sitte aşere ve mi’e ba‘de’l-elf. Şuhûdü’l-hâl: Es-Seyyid Mehmed Emin Efendi b. es-Seyyid Halil Efendi, Fahrü’l-kuzât Mustafa Efendi, Mustafa Efendi b. Şaban, Süleyman b. Mustafa, Süleyman b. Abdullah, Fahrü’l-kuzât es-Seyyid Ali Efendi b. Abdülkerim. Mustafa b. Bedreddin, Molla Mehmed b. Mahmud.