Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 247 Hüküm no: 199 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Petro’nun, Ahmed Bey aleyhindeki müşterek gemi hissesi davasının reddedilmesi Bâ-imzâ-i hazret-i veliyyü’n-ni‘am Husûs-ı âti’l-beyanın mahâllinde istimâ‘ı içün bi’l-iltimâs savb-ı şer‘den bâ-fermân-ı âlî mezûnen irsâl olunan Sandalcızâde Mevlânâ İsmail Efendi mahrûse-i Galata’ya tâbi‘ Tophane İskelesi’nde merbût cemî‘ âlât-ı lâzımesi ile Ahmed Bey b. Mehmed Paşa ve el-Hâc Mehmed b. Receb nâm kimesne ile Nikola v. Petro nâm zimmînin ber-vech-i iştirâk yedlerinde mülkleri olup otuz altı zirâ‘ şayka ta‘bîr olunur sefîneye varıp zeyl-i sahîfede mastûrü’l-esâmi Müslimîn huzûrlarında akd-i meclis-i şer‘-i kavîm etdikde mezbûr Nikola meclis-i ma‘kūd-ı mezkûrda işbu râfi‘ü’l-vesîka mezbûr Ahmed Bey mahzarında üzerine da‘vâ ve takrîr-i kelâm edip işbu mu‘âyene olunan sefînenin on iki sehmde altı sehim-i şâyi‘i benim mülküm olup ve üç sehmi mezbûr Ahmed Bey’in ve üç sehmi dahi işbu hâzır bi’l-meclis el-Hâc Mehmed’in mülkü olmağla hâlâ sefîne-i mezbûrenin beş sehmini mezbûr Ahmed Bey ve dört sehmini mezbûr el-Hâc Mehmed zabt edip <> hâlâ mezbûr Ahmed Bey’e suâl, benim bi-gayrı hakkın vaz‘-ı yed eylediği hissemden kasr-ı yedine tenbîh olunmak matlûbumdur dedikde gıbbe’s-suâl, mezbûr Ahmed Bey cevâbında fi’l-hakīka bundan akdem işbu sefîne-i mezbûrenin ve âlâtının on iki sehmden bir sehmi benim ve dört sehmi Sotoy v. Mihal nâm zimmînin ve dört sehmi Dimitri v. Marko nâm zimmînin mülkü ve üç sehmi dahi merkūm Nikola’nın mülkü olmağla ba‘dehû merkūm Sotoy sefîne-i mezbûrede olan dört sehim hissesini bana semen-i ma‘lûme ve makbûza bey‘ ve merkūm Dimitri dahi kezâlik sefîne-i mezbûrede olan dört sehim hissesini işbu hâzır bi’l-meclis mezbûr el-Hâc Mehmed’e semen-i ma‘lûme ve makbûza bey‘ eylediklerinde mezbûr Nikola hâzır olup sefîne-i mezkûrenin zikr olunan on iki sehmden üç sehmi kendinin ve dörder sehmi merkūmân Sotoy ve Dimitri’nin ve bir sehmi benim mülküm olduğunu mahzar-ı şuhûdda bin yüz on iki Saferi’l-hayrı’nda ikrâr ve işhâd ve sefîne-i merkūmun ve âlâtının dokuz sehmden ber-vech-i muharrer zimmetlerimizi ibrâ ve iskāt eylediğinden sonra mezbûr Nikola husûs-ı mezbûru inkâr edip tekrâr bin yüz on beş senesi Recebi’nin yirmi beşinci günü Galata Mahkemesi’nde nâibü’ş-şer‘ olan İbrahim Efendi huzûrunda bizden da‘vâ ve biz dahi bâlâda zikr olunduğu üzere [55b] def‘le mukābele ve def‘-i mezkûrumuzu nâib-i mûmâ-ileyh huzûrunda merkūm Nikola muvâcehesinde şuhûd-ı udûlden Mehmed Çelebi b. Ali Kapudan [ve] İbrahim Çelebi b. Hasan nâm kimesneler şehâdetleri ile vech-i şer‘î üzere ba‘de’l-isbât mezbûr Nikola sefîne-i mezbûrenin ve âlâtının üç sehmden mâ‘adâsına ta‘arruzdan men‘ birle kıbel-i şer‘den yedimize hüccet-i şer‘iyye dahi verilmiş idi deyü mazmûnu takrîrine mutâbık ve mevlânâ-yı mezbûrun imzâ ve hatemini hâviye ve târîh-i mezbûr ile müverrah bir kıt‘a hüccet-i şer‘iyye ibrâz etdikde isre’n-nazar ve’l-kırâe ve gıbbe’l-istintâk ve’l-inkār mezbûr Ahmed Bey’den mazmûn-ı hüccet-i mezbûreye beyyine taleb olundukda udûl-i Müslimînden ve zeyl-i hüccet-i mezkûrede olan şuhûddan olup mahrûse-i mezbûre sükkânından el-Hâc İbrahim b. Hüseyin ve Halil Efendi b. Hüseyin ve Mustafa Bey b. Mehmed ve İsmail Çelebi b. Abdurrahman ve İbrahim b. Hüseyin ve el-Hâc Yusuf b. Abdullah nâm kimesneler li-ecli’ş-şehâde meclis-i şer‘e hâzirûn olup istişhâd olunduklarında fi’l-hakīka bundan akdem işbu sefîne-i mezbûrenin ve âlâtının on iki sehmden bir sehm-i şâyi‘i mezbûr Ahmed Bey’in ve dört sehmi mezbûr Sotoy’un ve dört sehmi mezbûr Dimitri’nin ve üç sehmi dahi merkūm Nikola’nın mülkü olmağla ba‘dehû merkūm Sotoy sefîne-i mezbūrede olan dört sehim hissesini merkūm Ahmed Bey’den semen-i ma‘lûme ve makbûza bey‘ edip ve merkūm Dimitri dahi kezâlik sefîne-i mezbûrede olan dört sehim hissesini mezkûr el-Hâc Mehmed’e semen-i ma‘lû[ma] ve makbûza bey‘ eylediklerinde mezbûr Nikola hâzır olup sefîne-i merkūmenin zikr olunan on iki sehmden üç sehmi kendinin ve dörder sehmi merkūmân Sotoy ve Dimitri’nin ve bir sehmi mezbûr Ahmed Bey’in mülkü olduğunu mahzar-ı şuhûdda bin yüz on iki Saferi’nde ikrâr ve işhâd ve sefîne-i merkūmenin dokuz sehmden ber-vech-i muharrer zimmetlerini ibrâ ve iskāt eylediğinden sonra mezbûr Nikola husûs-ı mezbûru inkâr edip tekrâr bin yüz on beş senesi Recebi’nin yirmi beşinci günü Galata mahkemesinde nâibü’ş-şer‘ olan mezbûr ibrâhim Efendi huzûrunda mezbûrân Ahmed Bey ve el-Hâc Mehmed’den da‘vâ ve onlar dahi bâlâda zikr olunduğu vech üzere def‘le mukābele ve def‘-i mezkûrlarını nâib-i mûmâ-ileyh huzûrunda merkūm Nikola muvâcehesinde şuhûd-ı udûlden mezbûrân Mehmed Çelebi b. Ali ve İbrahim Çelebi b. Hasan şehâdetleriyle vech-i şer‘î üzere ba‘de’l-isbât mezbûr Nikola sefîne-i mezbûrenin ve âlâtının üç sehmden mâ‘adâsına ta‘arruzdan men‘ birle yedlerine hüccet-i şer‘iyye dahi verilmişdi, bizler ber-vech-i muharrer hüccet-i mezkûrenin mazmûnuna bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olup işbu sefîne-i mezbûrenin ve âlâtının on iki sehmden üç sehmi mezbûr Nikola’nın ve beş sehmi mezbûr Ahmed Bey’in ve dört sehmi mezbûr el-Hâc Mehmed’in mülkü olduğunu lede’ş-şer‘ sâbit ve zâhir oldukdan sonra mûcebiyle ba‘de’l-hükm müdde‘î işbu sefîne-i mezbûrede ve âlâtında ber-vech-i muharrer hissesi olan üç sehmden mâ‘adâsına bî-vech mu‘ârazadan men‘ eylediğini mevlânâ-yı mezbûr mahâllinde tahrîr, ba‘dehû ma‘an ba‘s olunan Çukadâr el-Hâc Ali b. Abdullah ve Ali b. Mehmed ile meclis-i şer‘e gelip alâ-vukū‘ihî inhâ ve takrîr etmeğin mevlânâ-yı mezbûrun hükmünü tenfîz olunmağın mâ-vaka‘a bi’t-taleb ketb olundu. Fi’l-yevmi’r-râbi aşer min-şehri Rebî‘i’l-evvel sene sitte aşerate ve mi’e ve elf. Şuhûdü’l-hâl: Hüseyin Çavuş el-mübâşir, Ebubekir Çelebi b. Hüseyin, Mehmed Çelebi b. Salih, İsmail Çelebi b. Abdurrahman.