Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 249 Hüküm no: 200 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdasar v. Sahak’ın evlenmekten vazgeçtiği nişanlısı Sima bt. Ohan’ın zimmetini ibra etmesi Mahrûse-i Üsküdar’da sâkin Ermeni tâifesinden Bağdasar v. Sahak nâm zimmî mahmiye-i İstanbul’da meclis-i şer‘de bâ‘isetü’s-sifr Sima bt. ( ) nâm Nasrâniyenin babası ve tarafından husûs-ı âti’l-beyana vekîl olduğu nehc-i şer‘î ve tarîk-i mer‘î üzere sâbit olan Ohan v. Hıristosdos nâm zimmî muvâcehesinde ikrâr ve takrîr-i kelâm edip mezbûr Ohan’ın kızı müvekkile-i mezbûre Sima’yı bundan [akdem] nâmzed eylediğimde âyinimiz üzere nişân olmak üzere malımdan işbu dört taşlı altından bir yüzük verip müvekkile-i mezbûre Sima dahi dört makrame ile bir gömlek verdiğinden sonra müvekkile-i mezbûreyi nikâh ile almak murâd eylediğimde babası mezbûr Ohan husûs-ı mezbûra izin vermeyip nikâha râzı olmamak ile beynimizde nizâ‘-ı küllî vâki‘ oldukda el-hâletü hâzihi müvekkile-i mezbûrenin bana verdiği dört makreme ile bir gömleği ben babası mezbûr Ohan’a teslîm edip ol dahi mezbûr Sima’ya nişân nâmına verdiğim altın yüzük ile nikâh etmek sadedinde iken kendi için [56a] masrûfum olan sekiz guruşu babası mezbûr Ohan işbu meclis-i şer‘de bana teslîm ben dahi alıp kabz eylediğimden sonra müvekkile-i mezbûre Sima ile zevciyete müte‘allıka ba‘de’l-yevm da‘vâ ve nizâ‘ım kalmamağın husûs-ı mezbûra müte‘allıka âmme-i da‘vâdan müvekkile-i mezbûre Sima’nın zimmetini ibrâ ve iskāt edip ol dahi ber-vech-i muharrer benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Hasan Çavuş b. Mehmed, İbrahim b. Receb, Abdullah b. Mehmed, el-Hâc Yusuf b. Osman, Yusuf Çelebi b. Abdullah, Terzi Söknas, Vanos v. Arotin, Hokas v. Aslan