Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 250 Hüküm no: 201 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Yani’nin un ticaretinden ortağı olan Manol aleyhindeki alacak davasında sulh olması Uncu tâifesinden olup mahmiye-i İstanbul’da Unkapanı kapısı hâricinde sâkin Yani v. İstemat nâm zimmî mahmiye-i mezbûrede meclis-i şer‘-i hatîrde bağcılık san‘atında mukaddemâ şerîki olan Manol v. Praşkova nâm zimmî muvâcehesinde ikrâr ve takrîr-i kelâm edip biz mezbûr Manol ile san‘at-ı mezbûrede şerîk olup bundan akdem fesh-i akd-i şirket eylediğimizde beynimizde hesâb görüp mezbûr Manol zimmetinde benim altı bin akçe hakkım zuhûr etmekle mezbûr Manol ber-vech-i muharrer bana meblağ-ı merkūm altı bin akçe deyni olduğunu ikrâr ve yedime deyn temessükü dahi vermeğin meblağ-ı merkūmu bundan akdem mezbûr Manol’den taleb eylediğimde edâda ta‘allül etmekle beynimizde münâza‘ât-ı kesîre ve muhâsamât-ı şedîde cereyân etmiş idi. El-hâletü hâzihi beynimize muslihûn tavassut edip da‘vâ-i mezkûremden beni mezbûr Manol ile üç bin akçeye sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr üç bin akçeyi mezbûr Manol yedinden tamâmen ahz u kabz edip mâ‘adâsı olan üç bin akçeye müte‘allık ve şirkete ve târîh-i kitâba gelince beynimizde cereyân eden ahz u i‘tâya müte‘allıka âmme-i da‘vâdan ben mezbûr Manol’ün zimmetini ibrâ ve iskāt edip ol dahi bedel-i sulh-ı mezbûra ve şirkete ve târîh-i kitâba gelince kezâlik beynimizde cereyân eden ahz u i‘tâya müte‘allıka âmme-i da‘vâdan benim zimmetimi ibrâ ve iskāt eyledi. Fîmâ-ba‘d birbirimiz ile aslâ da‘vâ ve nizâ‘ımız yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 16 min-şehri Rebî‘ülevvel sene 1116. Şuhûdü’l-hâl: Mehmed Efendi b. Ahmed, İsmail Efendi el-kâtib, Ahmed Çelebi uncu, Hasan Çavuş b. Hüseyin el-mübâşir.