Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 250 Hüküm no: 202 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. İstemat’ın, vefat eden babasının Mizistre’deki terekesi haricinde kalan mirastan kardeşi Yani’nin zimmetini ibra etmesi Mahmiye-i İstanbul’da Unkapanı kurbünde sâkine iken bundan akdem hâlik olan İstemat v. Yani nâm zimmînin verâseti sulbî kebîr oğulları Yani ve Kostantin ve Yorgi nâm zimmîlere münhasıra olduğu şer‘an zâhir ve müte‘ayyin oldukdan sonra mezbûr Yorgi mahmiye-i mezbûrede meclis-i şer‘-i hatîr-i lâzımü’t-tevkīrde hâlik-i mezbûrun mahmiye-i mezbûrede olan terekesine bi’l-verâse vâzı‘ü’l-yed olan mezbûr Yani muvâcehesinde ikrâr ve takrîr-i kelâm edip babam hâlik-i mezbûrun mahmiye-i mezbûrede yanında mevcûd bulunan kalîl u kesîr ve celîl ü hakīr metrûkâtı karındaşım mezbûr Yani bi’l-verâse ahz u kabz eylediğinden sonra babam hâlik-i mezbûrun metrûkâtından bi’l-irsi’ş-şer‘î benim sülüs hisseme isâbet eden bin sekiz yüz otuz guruşun bin otuz guruşunu ve yine altı yüz yetmiş guruşunu dahi bir def‘a ki cem[‘a]n bin yedi yüz guruşunu mukaddemâ karındaşım mezbûr Yani Babam hâlik-i mezbûrun terekesinden bana def‘ ü teslîm ben dahi yedinden ahz u kabz edip yüz otuz guruş zimmetinde bâkī kalmışdır hâlâ meblağ-ı bâkī-i mezbûr yüz otuz guruşu dahi karındaşım mezbûr Yani bana def‘ ü teslîm ben dahi ahz u kabz edip bu vech üzere babam hâlik-i mezbûrun terekesinden bana isâbet eden sülüs hisse-i mezkûremi karındaşım mezbûr Yani’den tamâmen ahz u kabz edip babamız hâlik-i mezbûrun Mizistre nâhiyesinde Praşkova karyesinde olan beynimizde ma‘lûm metrûkâtından mâ‘adâ terekesine müte‘allıka âmme-i de‘âvî ve kâffe-i mutâlebâtdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 7 Rebî‘ülevvel sene 1116. Şuhûdü’l-hâl: Hasan Ağa b. Hüseyin mübâşir, el-Hâc Ahmed b. Hasan, Hüseyin Kethüdâ, Osman b. Mehmed, Ömer Beşe b. Ali, el-Hâc Hüseyin b. Kahraman Yani v. Adam, Yanaki v. Panayot, Yorgaki v. Manor, Dimitri v. İlya, Todori v. Yorgi, Yorgaki v. Panayot, Yorgi v. Mati?