Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 251 Hüküm no: 203 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Mehmed Çelebi’nin vefat eden annesinin terekesinden dolayı kardeşi Yahya Efendi’nin zimmetini ibra etmesi Mahmiye-i İstanbul’da Cebecibaşı mahâllesi ahâlîsinden olup bundan akdem intikāl-i dâr-ı bekā eden merhûme Âişe Hatun bt. el-merhûm Yakub Efendi’nin verâseti sadrî kebîr oğlu umdetü’l-müderrisîni’l-kirâm zübdedü’l-muhakkıkīni’l-fihâm Yahya Efendi b. el-merhûm Mustafa Efendi’ye ve âhar kebîr oğlu Salih Mehmed Çelebi b. İbrahim’e münhasıra ve tashîh-i meselesi iki sehmden olmağla bir sehmi müşârün-ileyh Yahya Efendi’ye ve bir sehmi mezbûr Salih Mehmed Çelebi’ye isâbet eylediğinden sonra mezbûr Salih Mehmed Çelebi mahmiye-i mezbûrede meclis-i şer‘-i hatîrde müteveffât-ı mezbûrenin terekesine bi’l-vesâye vaz‘-ı yed eden sâhibü’l-kitâb müşârün-ileyh Yahya Efendi mahzarında ikrâr ve takrîr-i kelâm edip vâlidem merhûme mezbûrenin cemî‘ ismi mâl ıtlâk olunur terekesinden tashîh-i mezbûr üzere benim hisseme isâbet eden iki yüz elli guruşu terekeden olmak üzere müşârün-ileyh Yahya Efendi yedinden bi’t-tamâm ve’l-kemâl alıp kabz eyledim ba‘de’l-yevm vâlidem merhûme mezbûrenin nukūd ve eşyâ ve evân-ı nühâsiye ve gayr-ı nühâsiye ve bi’l-cümle ismi mâl ıtlâk olunur terekesine ve târîh-i kitâba gelince beynimizde cârî hukūk-ı ma‘lûme ve mechûleye müte‘allıka âmme-i da‘vâdan müşârün-ileyh Yahya Efendi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim. Min-ba‘d tereke-i müteveffât-ı mezbûreye müte‘allık benden bir dürlü da‘vâ sudûr eylerse lede’l-hükkâmi’l-kirâm mesmû‘a olmasın dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 12 min-şehri Rebî‘ülevvel sene 1116 Şuhûdü’l-hâl: A‘lemü’l-ulemâi’l-izâm efdalü’l-fudalâi’l-fihâm el-Hâc Ahmed Efendi el-kādı bi-medîneti Galata, Umdetü’l-kuzât Cafer Sadık Efendi b. Ali Efendi, Fahrü’l-müderrisîn Ahmed Efendi b. İsmail, Şeyh Mehmed Efendi b. Yusuf, Hasan Efendi b. Mustafa, Hüseyin Çelebi b. Abdullah.