Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 252 Hüküm no: 204 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin Mustafa Çelebi aleyhindeki yaralama davasında sulh olması Mahmiye-i İstanbul’da Müftî Ali Çelebi mahâllesinde sâkin Mehmed Beşe b. Ahmed nâm kimesne mahmiye-i mezbûrede meclis-i şer‘-i hatîrde işbu bâ‘isü’l-vesîka Mustafa Çelebi b. Müezzin Celil nâm kimesne tarafından husûs-ı âti’l-beyanı tasdîka vekîl olduğu Şaban b. Himmet ve el-Hâc Ahmed b. Mehmed nâm kimesneler şehâdetleriyle şer‘an sâbit olan li-ebeveyn karındaşı Mehmed Çelebi mahzarında ikrâr ve takrîr-i kelâm edip müvekkil-i mezbûr Mustafa Çelebi târîh-i kitâbdan sekiz gün mukaddem eski imâret kurbünde beyaz saplı bıçak ile sol küreğimin üzerinde bi-gayrı hakkın beni darb ve cerh etmekle husûs-ı mezbûrun mûceb-i şer‘îsi bundan akdem müvekkil-i mezbûr Mustafa’dan taleb olundukda ol dahi inkâr etmekle beynimizde münâza‘ât-ı kesîre vâkı‘a olmuş idi. El-hâletü hâzihi beynimizde muslihûn tavassut edip da‘vâ-i mezkûremden beni müvekkil-i mezbûr ile on guruş üzerine sulh eylediklerinde ben dahi sulhu kabûl ve bedel-i sulh olan meblağ-ı mezbûr on guruşu müvekkil-i mezbûrdan ahz u kabz edip husûs-ı mezbûra ve mâ-yahdesu minhuya müte‘allıka da‘vâdan müvekkil-i mezbûrun zimmetini ibrâ ve iskāt edip ol dahi bedel-i sulh deyü bana medfû‘u olan meblağ-ı merkūm on guruşa müte‘allıka da‘vâdan benim zimmetimi ibrâ ve iskāt eyledi. Ba‘de’l-yevm birbirimiz ile da‘vâ ve nizâ‘ımız yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: Ömer Çelebi b. Mehmed, İsmail Efendi el-kâtib, İsmail Çelebi b. Mehmed, el-Hâc Yusuf b. Osman, Ali Ağa b. Ali, el-Hâc Mustafa b. Hasan, Mehmed Efendi el-kâtib.