Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 253 Hüküm no: 205 Orijinal metin no: [56b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Beşe’nin Görele’deki ev, bahçe ve tarla hisselerini Mustafa Beşe’ye satması Vilâyet-i Anadolu’da Görele kazâsına tâbi‘ Çeltikçi nâm karye ahâlîsinden Abdullah Beşe b. Ömer nâm kimesne mahmiye-i İstanbul’da meclis-i şer‘-i hatîrde sâhibü’l-kitâb Mustafa Beşe b. Halil nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülküm olup karye-i mezbûrede vâki‘ ma‘lûmü’l-hudûd ve’l-müştemilât menzil ve harman yeri ve bahçeden ve kezâlik karye-i mezbûre hudûdu dâhilinde vâki‘ ma‘lûmü’l-hudûd ve’l-kıt‘a bağlardan nısf hisse-i şâyi‘amı cemî‘ tevâbi‘ ve levâhıkı ile safka-i vâhide ile yüz on guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mustafa Beşe’ye bey‘ ve temlîk ve yine karye-i mezbûre hudûdu dâhilinde mevâzi‘-i adîdede vâki‘ lede’l-ahâlî ma‘lûmü’l-hudûd ve’l-kıt‘a tarlalardan dahi nısf-ı şâyi‘amın hakk-ı tasarrufunu bâ-ma‘rifet-i sâhib-i arz mezbûr Mustafa Beşe’ye yüz on guruş bedel mukābelesinde ferâğ ve tefvîz ve her birini mahâllerinde kabz ve tasarrufa mezbûr Mustafa Beşe’yi taslît eyledim ol dahi vech-i meşrûh üzere iştirâ ve temellük ve tefevvüz ve kabûl eylediğinden sonra semen-i merkūm ile bedel-i mersûmdan müctemi‘ olan iki yüz yirmi guruşu merkūm Mustafa Beşe yedinden bi’t-tamâm ahz u kabz eyledim. Min-ba‘d emlâk-ı mezkûre mezbûr Mustafa Beşe’nin mülk-i müşterâsı ve arazi-i merkūme hakk-ı müfevvezi olmuşdur, benim kat‘â alâka ve medhalim kalmadı, her birini mahâllerinde keyfe mâ yeşâ ve yahtâr mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâbi‘ aşer min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: el-Hâc Osman b. İsmail, Hasan b. ömer, Halil b. Hüseyin Dede, el-Hâc Yusuf b. Osman.